Petropavlda kúrd mádenı ortalyǵy zeınetkerlerge tegin balyq taratty
PETROPAVL. KAZINFORM – Alǵys aıtý kúnine oraı Petropavlda túrli is-shara ótip jatyr. Kezinde óńirge kúshpen qonystandyrylǵan kúrd halqynyń ókilderi de shet qalmaı, qaıyrymdylyq aktsııasyn ótkizdi.
Qaıyrymdylyq is-sharasy Petropavldaǵy 20 shaǵyn aýdanda ornalasqan saýda ortalyǵynyń aldynda ótti. Zeınetkerler ý-shýsyz kezekke turyp, tegin balyqty birinen keıin biri tártippen áketip jatty. Uıymdastyrýshylar bir qolǵa 4 keli balyqtan berdi.
«Alǵys aıtý kúnine oraı aktsııa uıymdastyrýdy sheshtik. Kúrd mádenı ortalyǵy 400 keli balyq satyp alyp, zeınetkerlerge tegin úlestirip jatyr. Osylaısha merekelik kóńil-kúı sylaýdy jón kórdik.
Jalpy bul is-sharanyń maqsaty - ár kúnimizdi baǵalaýǵa, árqaısymyzdyń boıymyzda izgi nıetti damytýǵa shaqyrý.
Merekege oraı elime beıbitshilik, Qazaqstanyma ósip-órkendeýdi tileımin.
Mundaı aktsııa úshinshi jyl qatarynan 1 naýryzda ótkizilip keledi. Jalpy qaıyrymdylyq is-sharalaryn jıi jasaımyz, qaıyrymdylyq jasasań, qaıyrymyn óziń kóresiń degen bar», - deıdi Soltústik Qazaqstan oblysy boıynsha kúrd mádenı ortalyǵynyń ókili Rasım Afandıev.
Aktsııa týraly áleýmettik jelide habarlandyrý bolǵan, sondyqtan kelýshilerdiń qarasy qalyń boldy.
«Kúrd mádenı ortalyǵyna alǵys aıtamyn, olar jylda qaıyrymdylyq is-sharasyn ótkizedi. Biz sııaqty zeınetkerlerdi nazardan tys qaldyrmaıdy. Byltyr da keldim, bıyl da balyqty tegin alyp turmyn, bizge bul az da bolsa kómek», - deıdi qala turǵyny Lıýdmıla Bondarenko.
