Petropavlda qurbandyq maldy qaıda shalýǵa bolady
PETROPAVL. KAZINFORM — Petropavlda Qurban aıt kúnderi mal soıýǵa bolatyn arnaıy oryn belgilendi.
Bıyl da Petropavlda osy maqsatta bir ǵana mal soıý alańy jumys istemek. Qurbandyq maldy Jumysshy kenti, Kosmonavtar kóshesi, 1 mekenjaıyndaǵy qasaphanada shalýǵa bolady.
«Qyzyljar» oblystyq ortalyq meshitiniń málimetinshe, qurban shalatyn orynnyń tazalyǵyna, sanıtarlyq-epıdemıologııalyq normalar men talaptardyń saqtalýyna mán berilip otyr.
— Halqymyz Qurban aıtty aıryqsha daıyndyqpen qarsy alǵan. Maldyń semizin, jaramdysy men eń jaqsysyn qurbandyqqa shalyp, onyń etin turmysy tómen adamǵa taratý, qonaq kútip, úlkenniń batasyn alý, syılyq-káde berý, renjitken jandy keshirý syndy amaldar — dástúrimizde qalyptasqan izgi qundylyqtar, — deıdi Soltústik Qazaqstan oblysynyń bas ımamy Hamzat Ádilbekov.
Din mamandarynyń aıtýynsha, qurbandyqqa shalynatyn mal minsiz ári sharıǵat talaptaryna saı bolýy mańyzdy.
— Qurbandyqqa qoı, eshki, iri qara nemese túıe shalýǵa bolady. Qoı men eshki bir adamnyń atynan baýyzdalady. Al, túıe men iri qarany bir adamnan jeti adamǵa deıin qosylyp shalýǵa bolady. Sondaı-aq, bir kózi joq, aqsaq, tym aryq, tisteri joq, qulaǵy kesilgen, quıryǵy nemese qulaǵynyń úshten bir bóliginen kóbi kesilgen maldy qurbandyqqa shalý durys emes. Sondaı-aq qoı men eshki bir jasqa jetý kerek. Úlkendigi bir jasar qoıǵa uqsas alty aıǵa tolǵan semiz ári iri qoıdy da qurbandyqqa shalýǵa ruqsat etiledi. Al, iri qara eki jasqa, túıe bes jasqa tolýy shart, — deıdi Hamzat Ádilbekov.
Buǵan deıin Bas múftı kásipkerlerdi Qurban aıt qarsańynda mal baǵasyn kótermeýge shaqyrǵanyn jazǵan edik.
