Petropavlda qýraǵan shópti órteý saldarynan bir úı janyp ketti

PETROPAVL. QazAqparat – Petropavl mańynda qýraǵan shóp pen qamys órtenip, jalynnyń qalanyń yqshamaýdanyna taralý qaýpi tóndi, dep habarlaıdy QazAqparat tilshisi.

Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, 2 mamyr kúni Petropavl mańynda qurǵaq shóp pen qamys órtendi. Bul jóninde turǵyndar 101 nómirine saǵat 13.22 mınýt ketkende habarlap, Bylǵary zaýyty yqshamaýdanynda qurǵaq shóptiń janyp jatqanyn aıtqan.

Oqıǵa ornyna oblys ortalyǵynyń birden úsh órt sóndirý bólimshesi jóneltildi. Qatty jelden jalyn órship, jaqyn mańdaǵy qamysty sharpydy, osylaısha órt 3 gektar jerge jaıyldy. Mamandar shaǵynaýdandaǵy turǵyn úılerdi aman alyp qalý úshin 2 saǵat boıy arpalysty. Alaıda bir turǵyn úı men eki qora-qopsy janyp ketti.

Órt tek saǵat 17.16 mınýt ketkende ǵana tolyq sóndirildi. Qaza tapqandar men zardap shekkender joq.