Petropavlda kún sýytýyna baılanysty úısizderge arnalǵan jataq ashyldy
PETROPAVL. QazAqparat – Petropavl qalasynda bıyl da sýyqtyń túse salysymen úısizderge arnalǵan 50 oryndyq ortalyq ashylyp, jatyn orynǵa muqtaj jandardy qabyldaı bastady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, tártip saqshylary turaqty mekenjaıy joq adamdardy anyqtaý maqsatynda jumysty jandandyrdy. Polıtseıler tańǵy saǵat 9.00-den 19.00-ge deıin úısizder kóp júretin jylý qubyrlarynyń jáne vokzal mańyn, jertólelerdi, qoqys polıgondary men bazarlardy tekseredi. Nátıjesine jyl basynan qalalyq polıtsııa basqarmasynyń qabyldap-bólý ornyna 2348 adam jetkizildi. Onyń 299-y sot sanktsııasymen sol jerge ornalastyryldy.
Qalalyq polıtsııa basqarmasy qabyldap-bólý mekemesiniń bastyǵy Rýslan Álibaevtyń sózine qaraǵanda, «Qańǵybas» jedel-aldyn alý is-sharasy mamyr jáne qyrkúıek aılarynda ótkizildi. Oǵan polıtsııanyń barlyq bólimsheleri jumyldyryldy. Tek ýchaskelik ınspektorlar ǵana mekemege 265 adamdy ákeldi. Bul jerde qańǵybastardy foto-beıne esepke alady, izdeýde bar-joǵyn bilý úshin saýsaq izderin tekseredi. Bıyl qabyldaý ornyna 215 adam tirkeýge alynsa, sonyń 61-i – áıel. Kezbelerdiń orta jasy 40 pen 50 aralyǵynda. Olar jazda negizinen saıajaılarda tursa, kún sýytysymen qalaǵa oralyp, vokzal, bazar mańdaryn jaǵalaıdy. Kóp qabatty úılerdiń kireberisterinde túneıdi. Mundaı jaǵdaıda polıtseılerge habar bergen jón.
Jumysshy kentiniń 2629 km mekenjaıy boıynsha ornalasqan qańǵybastarǵa arnalǵan túngi jataq bıyl da jumys isteıdi. Bul ortalyq salqyn túsisimen-aq 1 qazannan ashylyp, jatar jeri joq jandardy qabyldaı bastady. 50 orynǵa arnalǵan. Qańǵybastar bul jerde keshki saǵat 18.00-den tańǵy 10.00-ge deıin bola alady. «Ázirshe kelýshiler az bolǵanymen, aıazdy kúnderi jataq lyq tolady. Bul olardyń úsik almaýyna, aıazda qatyp qalmaýyna kómektesedi», - deıdi tártip saqshylary.
Turaqty mekenjaıy joq adamdarǵa qatysty aqparatty Petropavl qalalyq Polıtsııa basqarmasynyń qabyldap-taratý mekemesiniń kezekshi bólimine 8 (7152) 52-92-99 telefon nómiri arqyly habarlaýǵa bolady.
