Petropavlda kún saıyn aýyl sharýashylyǵy jármeńkesi ótip jatyr

PETROPAVL. QazAqparat – Petropavlda Jańa jyl merekesi qarsańynda kún saıyn aýyl sharýashylyǵy jármeńkesi ótip jatyr. 10 kún boıy turǵyndar et-sút, jumyrtqa sııaqty ónimderdi naryqtaǵy baǵadan 15-20 %-ǵa arzanǵa satyp ala alady, dep habarlaıdy QazAqparat tilshisi.

Petropavlda aýyl sharýashylyǵy jármeńkeleri 20 jeltoqsan kúni bastaldy. Saýda-sattyq oblys ortalyǵynyń 5 – «Altyn Arman», kommýnaldyq, «Prıvokzalnyı», «Korona», «Darııa» bazarlarynda uıymdastyrylǵan, osylaısha qalanyń negizgi aýdandary arzan azyq-túlikpen qamtyldy. Óńirde 13 aýdan bolsa, olar kezekpen óz ónimderin jármeńkege ákelip jatyr. Máselen, búgin kommýnaldyq bazarda Aqqaıyń, Jambyl jáne Qyzyljar aýdanynyń aýylsharýashylyǵy taýaryn óndirýshileri kelýshilerge óz ónimderin usyndy. Sórege qoı eti, qus pen shoshqa eti, sút ónimderi, jumyrtqa, bal, túrli kókónis qoıylǵan. Baǵasy dúkendegiden arzan.

Máselen, jylqy etiniń kelisi – 2400 teńge, sıyr eti 1700 teńgeden, qoı eti - 2200, qazdyń kelisi 2200 teńgeden saýdalanyp jatyr. Jumyrtqanyń 10 danasy 350 teńge turady.

Aýyl sharýashylyǵy jármeńkesi tańǵy saǵat 8.00-den 12.00 aralyǵynda 30 jeltoqsanǵa deıin kúndelikti jumys isteıdi.

«Oblys ákiminiń tapsyrmasymen 20 jeltoqsannan bastap uıymdastyrylyp jatyr. Maqsat, árıne, azyq-túlik baǵasyn turaqtandyrý, halyqty Jańa jyl merekesi aldynda arzan, ári tabıǵı sapaly ónimmen qamtamasyz etý. Turǵyndar tarapynan suranys úlken. Kúndelikti 3 tonnaǵa jýyq ónim satylyp jatyr», - deıdi Petropavl qalasy ákimdiginiń kásipkerlik, aýyl sharýashylyǵy jáne veterınarııa bólimi basshysynyń mindetin atqarýshy Ǵalymjan Abaev.