Petropavlda qulaǵan murja: Sot oqıǵaǵa qatysy bar qyzmetkerlerdi aqtady

PETROPAVL. QazAqparat – Petropavl qalalyq soty №2 jylý elektr ortalyǵynda qulaǵan murjaǵa qatysty istiń núktesin qoıdy. Óz mindetterine nemquraıly qarady dep aıyptalǵan kásiporynnyń burynǵy dırektory, bas ınjener men qazandyq tsehynyń basshysy aqtalyp shyqty, dep habarlaıdy QazAqparat tilshisi.

Petropavldaǵy 2-Jylý-elektr ortalyǵynda 2022 jyldyń 20 naýryzy kúni qulaǵan murjaǵa qatysty qozǵalǵan qylmystyq is Petropavl qalalyq sotynda qańtar aıynan beri qaraldy.

Kásiporynnyń burynǵy basshylary: JEO-2 dırektory Erjan Qońyrbaev, bas ınjener Sergeı Torohtıı jáne qazandyq tsehynyń basshysy Sergeı Marchenko mindetterine adal qaramaý baby boıynsha aıyptaldy.

Alaıda olardyń bári bul qyzmette tolyq bir jyl da istemegen bolyp shyqty.

Sot otyrysynda jartylaı opyrylyp túsken 150 metrlik murjanyń 2013 jyly tehnıkalyq tekserýden ótkendigi aıtyldy.

Nátıjesinde bul nysannyń birneshe jerden zaqymdalǵany, al keıin qulaǵan orny sol kezde apattyq dep tanylǵany anyqtaldy.

Olqylyq 2017 jylǵa deıin joıylýy kerek edi. Tıisti jumystyń atqarylǵan-atqarylmaǵany murjanyń qulaýyna baılanysty belgisiz.

Kýágerler jumystyń júrgizilmegenin aıtqan.

«Temir-beton murjasynyń paıdalaný ýaqyty - 50 jyl. Sodan keıin keshendik tekserý júrgizilýi tıis. Tek sodan keıin ǵana ony ári qaraı qoldanýǵa bola ma, joq pa sheshilýi kerek. Tekseris júrgizilgen, murjanyń apatty dep anyqtalǵan 11-12 býynynan qulap otyr. Sot úkimi zańdy kúshine engennen keıin prokýratýra barlyq laýazymdyq tulǵalardyń isine prıntsıpıaldy baǵa berýi tıis. Bul jaǵdaıda bir ǵana nusqany qarap, qalǵan laýazymdy tulǵalardyń áreketine baǵa berilmegen. Faktiler jáne sarapshylar murjada anyqtalǵan zaqymdardyń joıylmaǵandyǵyn, nysannyń apattyq jaǵdaıda jumys istegenin kórsetip otyr. Biraq sotqa jumysqa kiriskenine bir jyl da bolmaǵan mamandar tartylǵan. Osy oqıǵaǵa jol bergen barlyq laýazymdy tulǵalarǵa protsestik sheshim qabyldanýy tıis», - deıdi Petropavl qalalyq sotynyń sýdıasy Almas Jumaǵazın.

Sýdıanyń aıtýynsha, kóptegen sarapshynyń jáne mamandardyń qorytyndysynda murjanyń bir sátte qulamaǵany aıtylady.

«Aıyptaýshylar bolsa bizge kerisinshe, sottalýshy úsh adamdy kináli etip kórsetkisi keldi, ıaǵnı tótenshe jaǵdaı solar basqarǵan merzimde bolǵanyn alǵa tartty. «Sevkazenergo» AQ tarapynan qoldaý bolyp, istiń mán-jaıyn anyqtaýǵa atsalysty, óz qarajatyna kóptegen saraptama júrgizdi. Qorǵaýshylar da elimizdiń jáne reseılik mamandardyń qorytyndysyn berdi, olar sotqa deıingi tergeýdi tolyqtyrdy», - deıdi Almas Jumaǵazın.

Osynyń bárin eskere kele Petropavl qalalyq soty sottalýshylardy aqtap shyqty.

Sot úkimi zańdy kúshine engen joq.