Petropavlda qudyqta ýlanǵan jumysshylarǵa qatysty tekserý qorytyndysy jarııalandy
PETROPAVL. QazAqparat – Petropavlda qudyqty tazartý kezinde ýlanyp, bireýi qaza tapqan úsh jumysshyǵa qatysty tekseris aıaqtaldy. Arnaıy komıssııa jazataıym oqıǵa jumyspen baılanysty emes degen qorytyndyǵa keldi, dep habarlaıdy QazAqparat tilshisi.
Esterińizge salaıyq, 31 tamyz kúni Petropavlda jańadan salynyp jatqan qazaq teatrynyń qurylys alańynda káriz qudyǵyn tazalaý kezinde úsh jumysshy ýly gazdan ýlanǵan edi.
20 jastaǵy jigit sol jerde qaza tapty, 19 jastaǵy jáne 18 jastaǵy eki jumysshy aýyr halde aýrýhanaǵa jetkizildi.
Rezonans týdyrǵan oqıǵa boıynsha SQO memlekettik eńbek ınspektsııasy basqarmasynda arnaıy komıssııa qurylyp, istiń mán-jaıyn anyqtady.
«Komıssııaǵa oqıǵanyń anyq-qanyǵyna jetý úshin 10 kún kerek boldy. Tekserý barysynda jumys berýshiniń laýazymdy qyzmetkerleri zardap shegýshilerdi jumysqa almaǵany anyqtaldy. Ol úsh er adam qurylys alańynda zańsyz jumys istegen.
ıAǵnı sol uıymda ár túrli jumys atqaratyn jumysshy asyǵyp, ketý kerek bolǵandyqtan, kómekke tanysyn shaqyrǵan. Ol aqsha tapqysy kelgen taǵy eki jigitti erte kelgen. Munyń bári qujattarmen, suraý salý arqyly dáleldendi. Komıssııa bul jerde jazataıym oqıǵa jumyspen baılanysty emes degen qorytyndyǵa keldi», - deıdi osy komıssııaǵa jetekshilik etken memlekettik eńbek ınspektory Gúlnar Murzaqanova.
Komıssııa quramyna eńbek ınspektorlarynan basqa jumys berýshiniń jáne zardap shegýshi jaqtyń ókilderi jáne toptyq ýlaný bolǵandyqtan Petropavl qalalyq sanıtarııalyq epıdemıologııalyq baqylaý basqarmasynyń mamandary kirdi.
«Qudyq qorshalǵan aýmaqta bolǵan, ol jerge bóten adamnyń kirýine ruqsat joq. Uıymnyń jumysshysy ol jerge jumysqa qatysty joq úsheýdi ertip kirgen, solarmen birge jumys istegen. Biz qorytyndyǵa jazdyq, bul jerde ýchaske bastyǵy óz jumysshysyna tıisti baqylaý qamtamasyz etpegen. Qol astyndaǵy jumysshysynyń is-áreketin qadaǵalamaǵan, onyń basqa bireýlerdi jumysqa tartýyna jol bergen.
Sondyqtan qazirgi ýaqytta bolǵan oqıǵaǵa qatysty kim jáne qalaı jaýap beredi, ázirge belgisiz. Bul jaǵdaıdy jumys berýshi de óz arasynda qaraıtyn bolady. Bolashaqta mundaı oqys oqıǵalar qaıtalanbaýy úshin uıymda birqatar shara qolǵa alyndy», - deıdi Gúlnar Murzaqanova.
Bul oqıǵa boıynsha quqyq qorǵaý organdary qylmystyq is is qozǵaǵan edi, tıisti saraptamalar júrgizilip jatyr.
Foto: polisia.kz
