Petropavlda qubyrdyń jarylýynan 5 áleýmettik nysan, myńǵa jýyq abonent sýsyz qaldy

PETROPAVL. QazAqparat – Petropavlda qubyr jarylyp, 14 kópqabatty úıdiń 825 páteri, 5 áleýmettik nysan sýdan ajyratyldy. Apat ornynda mamandar jumys istep jatyr, dep habarlaıdy QazAqparat tilshisi.

«Qyzyljar sý» JShS málimetinshe, Petropavldaǵy Abaı-Jumabaev kósheleri aralyǵynda keshe saǵat 15.40 shamasynda dıametri 800 mm sýyq sý qubyry jaryldy. Saldarynan qalada birer saǵatqa sý berý toqtatyldy .

«Sý dalaǵa ketpeýi úshin qysymdy ádettegi 6,4 atmosferadan 3-ke deıin tómendettik. Saǵat 19.30-da 14 kópqabatty turǵyn úıden basqasynyń barlyǵynda qysym qalpyna keltirildi. Munda 825 abonent bar. Saǵat 20.15-te 13 kópqabatty turǵyn úıdiń birinshi-úshinshi qabattaryna sý berildi. Búgin tańǵy saǵat 8.00 shamasynda sý jelisindegi zaqymdanǵan jer anyqtaldy. Qubyr kollektordyń janynan jarylǵan eken», - deıdi «Qyzyljar sý» JShS atqarýshy dırektory.

Mamannyń aıtýynsha, qazirgi ýaqytta sý M.Jumabaev 116 mekenjaıyndaǵy 9 qabatty úıde, M.Jumabaev atyndaǵy joǵary kolledjinde, basseınde, Amanat partııasynyń SQOF jáne «Esil» bıznes ortalyǵynda joq.

Qalǵan 13 kópqabatty turǵyn úıge sý tolyǵymen berildi.

Apat ornynda «Qyzyljar sý» JShS brıgadasy toqtaýsyz jumys istep jatyr.