Petropavlda qubyr jelisinde apat bolyp, turǵyndar sýsyz qaldy

PETROPAVL. QazAqparat – Petropavlda sý qubyry zaqymdanyp, qalany jeliden ajyratýǵa týra keldi, dep habarlaıdy QazAqparat tilshisi.

Petropavldaǵy Internatsıonal kóshesin áp-sátte sý basty. Áleýmettik jelide taraǵan beınejazbalardan sýdyń qatty aǵysyn kórýge bolady. Turǵyndar qalanyń ár aýdanynda sýdyń toqtatylǵanyn aıtyp jatyr.

«Qyzyljar sý» JShS baspasóz qyzmetiniń málimetinshe, Jumabaev-Abaı kóshelerindegi ýchaskede dıametri 800 mm sý qubyry zaqymdanǵan. Qazirgi ýaqytta osy apat bolǵan ýchaskede sýdy sóndirý jumystary júrgizilip jatyr.

«Qalaǵa baratyn sýdyń qysymyn ýaqytsha tómendetýge týra keldi. Bir saǵattan keıin ol qalpyna keltiriledi. Biraq, sý qubyry zaqymdanǵan ýchaskedegi 10 kóp qabatty úıge sý tek bir táýlikten keıin ǵana, apattyń saldary joıylǵannan soń berilmek», - dedi kásiporynnyń baspasóz hatshysy Indıra Qalıeva.

Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, jóndeý jumystarynyń júrgizilýine baılanysty M. Jumabaev kóshesindegi № 101, 105, 107, 111, 116 úılerde, Abaı kóshesindegi № 25 úıde, Internatsıonal kóshesindegi № 29, 30, 31, 33 úılerde, E. Býketov kóshesindegi № 14, 16, 18 jáne N. Nazarbaev kóshesindegi № 126 úıde sý berý ýaqytsha toqtatyldy.

Bul mekenjaıda turatyn turǵyndarǵa sý kezekpen jetkizilip jatyr.

Al jalpy, Petropavl qalasynda sýmen qamtýdy qalpyna keltirý jumystary jospar boıynsha 7 qarasha kúni saǵat 18:00-ge deıin aıaqtalmaq.