Petropavlda krossover órt sóndirý mashınasyn soqty
PETROPAVL. QazAqparat – Petropavlda jeńil kólik júrgizýshisi rólge ıe bola almaı qalyp, órt sóndirý qyzmetiniń mashınasyna soǵyldy, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, kólik apaty keshe keshki saǵat 19.00 shamasynda bolǵan. Petropavldaǵy Mamlıýt tas joly kóshesinde Nissan Qashqai jáne órt sóndirý qyzmetiniń KAMAZ ATs-6 mashınasy soǵylyp qalǵan. Krossoverdiń 54 jastaǵy áıel júrgizýshisi jaraqat alyp, qalalyq úshinshi aýrýhananyń jaraqat bólimshesine jetkizildi. Kólikte 83 jastaǵy ájeı de aýrýhanaǵa ákelingenimen, medıtsınalyq kómekten keıin úıine jiberildi.
Jeńil kóliktiń júrgizýshisi qos jolaqty kesip ótip, joldyń qarsy betine shyǵyp ketken. Kólik apatyna qatysty tıisti saraptama jasaldy, jınalǵan materıal Petropavl qalalyq polıtsııa basqarmasynyń ákimshilik polıtsııa bólimine jiberildi.
