Petropavlda krannan aqqan sýdyń sapasy jaqsardy, ishýge bolady — Jeńis Sultanov

PETROPAVL. KAZINFORM — Petropavlda krannan aqqan sýdy asqa paıdalanýǵa bolady. Alynǵan synama onyń aǵzaǵa zııansyzdyǵyn kórsetti.

Bul týraly búgin Soltústik Qazaqstan oblystyq tótenshe jaǵdaılar departamentinde ótken brıfıngte «Qyzyljar sý» JShS bas dırektory Jeńis Sultanov málim etti. 

«Sýdyń quramynda hlordyń mólsheri ádette 0,3 mg/l bolýy qajet. Sanıtarııalyq qyzmet qazir bizge ony 0,8-1-ge deıin jetkizýge ruqsat berip otyr. 
Sýdyń laılylyǵy buǵan deıin 19 mg/l bolsa, búgin 3-ke deıin tústi. Bul jaqsy kórsetkish. Sondaı-aq mıkrobıologııalyq, bakterıologııalyq kórsetkishteri de normaǵa saı. Sondyqtan sýdy ishýge bolady», — deıdi Jeńis Sultanov.

Kásiporyn dırektorynyń aıtýynsha, jylda kóktemde sý laılanady, ol ózen sýlary deńgeıiniń kóterilýine baılanysty qalypty jaǵdaı. Mundaıda sýdy aldyn ala tundyryp nemese qaınatyp ishken jón. 

«Petropavldy sýmen jetkilikti kólemde sýmen qamtý úshin qazir kúnde 400-deı adam eńbek etedi. Olardyń tamaǵyna qajet sýdy ózimiz krannan alyp jatyrmyz. Osy kúnge deıin eshkim aýyrǵan joq, bárimiz amanbyz. Sýǵa ketken birinshi sorǵy stantsııany tasqyn beti qaıtyp, jer qurǵasymen qaıta qalpyna keltiremiz. Oǵan kóp ýaqyttyń qajeti bolmaıdy. Qazirgi balama kóz — Pestroe kólinen alynyp jatqan sýdan da bas tartpaımyz, ony jónge keltirip, rezerv retinde qoldanamyz», — deıdi Jeńis Sultanov.

Esterińizge salaıyq, Petropavlǵa kelgen tasqyn «Qyzyljar sý» JShS-niń birinshi kótergish sorǵy stantsııasyn elektr energııasymen qamtıtyn 4 balama júıeni isten shyǵardy.

Saldarynan qalada sý berý toqtap qaldy. 

Petropavldy sýmen qamtý úshin balama kózder qarastyryldy. 

Eki kún ishinde másele sheshilip, sý Pestroe kólinen berile bastady.