Petropavlda Qozybaev oqýlary ótti

PETROPAVL. QazAqparat – Petropavlda belgili qazaq ǵalymy, tarıhshy, qoǵam qaıratkeri Manash Qozybaevtyń týǵanyna 90 jyl tolýyna oraı «Qozybaev oqýlary-2021: bilim men ǵylymdy damytýdaǵy jańa tásilder men zamanaýı kózqarastar» atty halyqaralyq ǵylymı-praktıkalyq konferentsııa ótti, dep habarlaıdy QazAqparat tilshisi.

Petropavldaǵy Soltústik Qazaqstan ýnıversıteti 2003 jyldan bastap akademık Manash Qabashuly Qozybaevtyń esimimen atalady. Al Qozybaev oqýlaryn ótkizý ıgi dástúrge aınalǵan. Bıyl konferentsııaǵa onlaın túrde Qazaqstan, Frantsııa, Lıtva jáne TMD elderiniń ǵalymdary qatysty, 370-ten astam baıandama kelip tústi.

Іs-shara Manash Qozybaevtyń músinine gúl shoqtaryn qoıýdan bastaldy. Ǵalymnyń áriptesteri, shákirtteri, ýnıversıtettiń professorlyq-oqytýshylyq quramy osylaısha qurmet kórsetti.

Plenarlyq otyrysta SQO ákiminiń atynan konferentsııaǵa qatysýshylarǵa onyń orynbasary Ǵanı Nyǵymetov quttyqtady. Sonymen qatar, konferentsııada Memleket jáne qoǵam qaıratkerleri, elimizdiń iri joǵary oqý oryndarynyń rektorlary, ǵylymı jáne mádenı ortalyqtardyń basshylary sóz sóıledi. Olar akademık Qozybaevtyń zertteýleri, onyń azamattyq ustanymy jańa memlekettiliktiń qalyptasýynda mańyzdy ról atqarǵanyn, onyń eldiń kórnekti ǵalymdarynyń qataryna ekendigin aıtty.

Qazaqstan Respýblıkasy Parlamenti Senatynyń depýtaty Muhtar Qul-Muhammed Manash Qozybaevtyń álemdik tarıh ǵylymyndaǵy erekshe mańyzy týraly óz sózinde atap ótti.

Kozybayev University Basqarma Tóraǵasy-rektory Erlan Shýlanovtyń aıtýynsha, Manash Qozybaevtyń ómir joly - Qazaqstan ǵylymyna uzaq, adal qyzmet etýdiń úlgisi. Ol daryndy ǵalymdardy - shamamen 90 ǵylym kandıdaty men doktorlardy daıyndady.

Іs-shara barysynda akademık M.Qozybaevtyń 90 jyldyǵyna oraı jaryq kórgen «Istorık v menıaıýşemsıa mıre. Tarıhshy jáne onyń zamany» qujattar men materıaldardyń jınaǵy, sondaı-aq «Akademık Manash Qozybaev jáne Táýelsizdik belesteri» atty ǵylymı eńbekter men estelikter jınaǵy tanystyryldy.

Kórnekti ǵalymdar «Táýelsizdik jáne ulttyq tarıhı kod», «Manash Qozybaevtyń eńbekterindegi Otan tarıhynyń ózekti máseleleri», «Akademık Manash Qozybaevtyń tulǵalyq fenomeni», «Ǵylymdaǵy ınnovatsııalar: Qazaqstan men Lıtvanyń salystyrmaly taldaýy» sııaqty jáne taǵy basqa baıandamalar usyndy.

Sondaı-aq, Qazaqstan Respýblıkasy Prezıdenti Arhıviniń Manash Qozybaevtyń ómiri men qyzmetine arnalǵan kórmesi uıymdastyryldy.