Petropavlda Qojabergen jyraýdyń alyp eskertkishi ornatyldy
Monýment «Rýhanı jańǵyrý» baǵdarlamasy aıasynda jáne tarıhı tulǵanyń 355 jyldyq mereıtoıyna oraı boı kótergen. Eńseli eskertkishtiń ashylý saltanatyna oblys ákimi Qumar Aqsaqalov jáne «Nur Otan» partııasy Tóraǵasynyń birinshi orynbasary Máýlen Áshimbaev qatysty.
Týǵan jeri Qyzyljar óńirinde boı kótergen Qojabergen jyraýdyń alyp músini qazaq ultynyń rýhyn bıikteteri sózsiz. Jalpy bıiktigi 12 metrlik eńseli eskertkishtiń tuǵyry Qordaıdyń granıtinen, al jyraýdyń músini qoladan quıylǵan.
Avtory - elge esimi belgili sheber, mádenıet qaıratkeri Qazybek Satybaldın. Músin Almatyda quıylyp, jetkizildi. Al, monýmentti ornatý úshin jumysshylar 3 aı tynymsyz eńbek etti. Jobanyń quny - 80 mln teńge.
«Qojabergen babamyzdyń beınesin jasaýmen 12 jyl aınalystyq. Jumys barysynda 18-20 shaqty obrazdy shyǵardym. Bir kúni tús kórdim. Túsimde Qojabergen babamyz en dalada erin jastanyp qalyń shóptiń arasynda uıyqtap jatyr eken. Men álgi kisiniń bet-álpetin kórmek bolyp aınalyp júgirip júrmin, obrazyn ashý kerek qoı erteń. Eskertkish kóńilimnen shyqty», - deıdi músinshi Qazybek Satybaldın.
«Keýdeńde shybyn janyń bolsa eger, joǵaltpa jer betinen qazaq atyn» dep jyrlaǵan Qojabergen jyraý esimi elimiz táýelsizdik alǵannan keıin ǵana tanyla bastady. 17-18 ǵasyrlarda ómir súrgen tulǵa kópshilikke eń aldymen ultymyzdyń aýyr kezeńin jyrlaıtyn «Elim-aı» jyrynyń avtory retinde jaqsy tanys.
«Qolbasshy bolǵan, qaramaǵynda 80 myń áskeri bolǵan deıdi. Qalmaqtarmen soǵysyp, eldi jaýdan aman alyp qaldy. Sondaı-aq, aqyn, jyrshy, «Elim-aıdyń» mýzykasyn jazǵan, sózin jazǵan. «Jeti jarǵynyń» avtorlarynyń biri», - deıdi Qojabergen Tolybaıulynyń urpaǵy Nurlan Jumabaev. 
Avtor: Aqerke Dáýrenbekqyzy
