Petropavlda kósheni tazartý jumystaryn esepke alýǵa jasandy ıntellekt júıesi qoldanylyp jatyr
PETROPAVL. KAZINFORM – Petropavldan qys bastalǵaly 190 myń tekshe metr qar shyǵaryldy.
Soltústik Qazaqstan oblysy ákimdiginiń málimetinshe, Petropavldaǵy kóshe-jol jelisiniń jalpy uzyndyǵy 366 km. Qysta joldardy kútip-ustaý jumystaryn tıimdi uıymdastyrý maqsatynda qala aýmaǵy toǵyz sektorǵa bólingen. Qazirgi ýaqytta joldardy tazalaý jáne kútip-ustaý jumystaryna 100-den astam arnaıy tehnıka jumyldyrylǵan. Boranda qajettilikke qaraı olardyń sany 170-ke deıin jetkiziledi.
Aldymen magıstraldyq kósheler, trotýarlar jáne áleýmettik nysandarǵa aparatyn joldar tazalanady. Qys bastalǵaly beri qala aýmaǵynan 190 myń tekshe metr qar shyǵarylǵan.
«KazMehMontaj» JShS qaramaǵynda 40-tan astam tehnıka bar. Olardyń ishinde avtogreıderler, MTZ bazasyndaǵy şetkalar, kóshelerge reagent sebýge arnalǵan jol mashınalary jáne 15 júk kólikteri bar. Barlyq arnaıy tehnıka GPS-trekerlermen jabdyqtalǵan, bul olardyń qozǵalys baǵyttaryn, ornalasqan jerin jáne jumys ýaqytyn baqylaýǵa múmkindik beredi.
Kóshelerdi tazartý kún saıyn, negizinen túngi ýaqytta júrgiziledi, sebebi kúndiz kólik qozǵalysynyń kóptigine baılanysty jumystardy oryndaý qıyndaıdy. Jeke sektor turǵyndarynan túsken ótinishtermen kúndizgi arnaıy brıgada jumys isteıdi.
Sonymen qatar oblys ortalyǵynda kommýnaldyq salada tsıfrlyq baqylaý kúsheıtilip jatyr. Jaqynda kóshelerden qar shyǵarý jáne joldardy tazalaý jumystaryn esepke alatyn jasandy ıntellekt júıesiniń alǵashqy tanystyrylymy ótti. Bul júıe atqarylǵan jumystardyń kólemin avtomatty túrde tirkep, arnaıy tehnıkanyń qozǵalys marshrýttaryn taldaýǵa jáne qar shyǵarý boıynsha kórneki statıstıka qalyptastyrýǵa múmkindik beredi.
Mamandardyń aıtýynsha, JI engizý protsesterdiń ashyqtyǵyn arttyryp, baqylaýdy jeńildetýge jáne qysqy kezeńdegi jumystardy tıimdi josparlaýǵa baǵyttalǵan.
Buǵan deıin Almaty kóshelerinen 11 myń tekshe metrden astam qar shyǵarylǵanyn jazǵan edik.