Petropavlda kóshelerge aqyldy vıdeobaqylaý kameralary ornatylady
PETROPAVL. QazAqparat - Petropavlda polıtseıler memlekettik-jekeshelik áriptestik aıasynda 42 ıntellektýaldyq júıe ornatýdy josparlap otyr, dep habarlaıdy QazAqparat tilshisi.
Oblystyq Іshki ister departamenti baspasóz qyzmetiniń málimdeýinshe, qazir qalada 7 «aqyldy» kóshe qıylysy bar. Olar 2014-2015 jyldary ornatylǵan. Ondaǵy vıdeokameralar jol erejesin buzǵan kóliktiń nómirin «jattap» alady.
«Bastapqyda bir qıylystyń ózinde kúnine 300-ge jýyq jol erejesin buzý deregi anyqtalatyn. 2015 jyldyń aıaǵyna qaraı bul meılinshe qysqardy. Qazir «aqyldy» qıylystardaǵy jol erejesin buzý sany kúnine úsh-tórteýden aspaıdy», - deıdi oblystyq ІІD Ákimshilik polıtsııa basqarmasy bastyǵynyń mindetin atqarýshy Bolat Jeksembınov.
Polıtseıler «aqyldy» vıdeobaqylaý júıesiniń sapasyn da arttyrmaq. Nómir belgilerin tirkeý úshin 8 júıe qajet. Aldaǵy ýaqytta Petropavlǵa kirer joldardyń barlyǵy, qalanyń negizgi kólik toraptary baqylaýǵa alynady.
«Jol erejesin buzǵandardy 14 turaqty keshen, 5 jyljymaly keshen anyqtap otyrady. Mundaı tehnologııalar ázirge tek Almaty jáne Atyraý oblystarynda ǵana bar. Adamdardy tanıtyn, túrli qozǵalystar tıpterine, tipti dybystarǵa da «eleń» etetin 15 joǵary tehnologııaly júıeni satyp alý josparda bar», - dep málimdedi vedomstvonyń baspasóz qyzmeti.
Jyl basynan beri ıntellektýaldyq júıeler Petropavl qıylystarynda 354 jol erejesin buzý deregin anyqtaýǵa múmkindik bergen.
