Petropavlda kóshelerden qardy shyǵarýǵa áskerıler men eriktiler kómektesip jatyr
PETROPAVL. KAZINFORM — Petropavlda sý tasqynyna qarsy sharalar kúsheıtilip, aýqymdy senbilik ótti.
Negizgi kúsh erigen qar sýy jınalyp, úılerge kirýi múmkin «Birlik» shaǵyn aýdanyna, Jumysshy kentine jumyldyryldy.
Jaýapty kommýnaldyq qyzmetter oblys ortalyǵynan qardy toqtaýsyz polıgonǵa shyǵaryp jatyr. Bul joly olarǵa ondaǵan uıym, áskerıler men volonterler senbilik aıasynda kómekke keldi.
— Búgingi kúni qala kóshelerinde 200-den astam tehnıka, 300-den astam adam jumys istep jatyr. Qar sýy jınalatyn ýchaskeler kezek-kezekpen tazartylyp jatyr.
Nóserlik káriz júıeleri qolmen tazartylady. Bul — sý basýdyń aldyn alýda óte mańyzdy, — deıdi Soltústik Qazaqstan oblysy ákiminiń birinshi orynbasary Marat Tasmaǵanbetov.
Petropavlda jańbyr sýyn aǵyzý júıeleriniń jalpy uzyndyǵy 119 km jabyq jáne 116 km ashyq jatqan aryqtary bar.
— Qazir kúnde jańbyr sýyn aǵyzý júıesin tazalaý jáne onyń úzdiksiz jumysyn qamtamasyz etý úshin jumys istep jatyrmyz. Sońǵy aptada qalyń qar jaýyp, boran turyp, saldarynan qalanyń keıbir ýchaskelerinde aryqtardy 2-3 ret qaıta tazalaýǵa týra kelgen, — deıdi Petropavl qalasy ákimdiginiń tazartý, sý burý jáne sý ótkizý qurylystary kásiporny dırektorynyń orynbasary Aıdar Ospanov.
Mamandardyń aıtýynsha, bıyl qys mezgilinde Petropavldan ǵana 850 myń tekshe metrden astam qar shyǵaryldy.
Jumys kúsheıtilgen rejımde jalǵasady. Negizgi maqsat — qardyń qarqyndy erý kezeńinde turǵyndardyń qaýipsizdigin qamtamasyz etý.
Buǵan deıin SQO-da ózenderde muzdy jarýǵa 84 mln teńge jumsalatynyn jazǵan edik.
