Petropavlda kóshedegi áıeldiń altyn alqasyn tartyp alǵan ury vıdeoǵa túsip qalǵan
ASTANA. QazAqparat - Petropavl qalasynyń quqyq qorǵaýshylary kóshede ketip bara jatqan áıeldiń altyn alqasyn tartyp alǵan Shymkent qalasynyń 30 jastaǵy turǵynyn ustady, dep habarlaıdy «QazAqparat» HAA tilshisi.
Petropavl qalasynyń turǵyny Batyr Baıan kóshesindegi «ıÝbıleınyı» dúkeniniń mańynda belgisiz bireý altyn alqasyn julyp alyp, qashyp ketkendigin aıtyp polıtsııaǵa shaǵymdanǵan. Avtobýsta kele jatqan jábirlenýshi urynyń ózin ańdyǵanyn baıqamaı qalsa kerek.
Radıoefır boıynsha jedel basqarma ortalyǵynyń kezekshi ınspektorlarynyń habarymen polıtsııanyń barlyq kezekshileri osy jaǵdaı boıynsha qulaqtandyrylǵan. Beınebaqylaý kezekshiliginiń ınspektory, polıtsııanyń aǵa leıtenanty Gúlmıra Daırshına vokzalǵa jaqyn mańda kúdikti jas jigitti baıqap qalady.
«Onyń júrgen jerine «Suńqar-372» avtopatrýliniń kezekshileri birden jetip, 30 jastaǵy jigitti qolǵa túsirgen. Keıin anyqtalǵanyndaı, buryn sotty bolǵan Shymkent qalasynyń turǵyny Reseıdiń Omby qalasyna ketip bara jatyp, jolda aqsha taýyp qalýdy oılasa kerek. Altyn alqany satyp jiberý úshin tartyp alǵan», - dep habarlaıdy SQO ІІD-nen.
Atalǵan oqıǵa boıynsha QR QK 191-baby boıynsha qylmystyq is qozǵalyp, kúdikti ýaqytsha ustaý ızolıatoryna qamaldy.
