Petropavlda kóshedegi aǵashtardyń qaıta-qaıta qulaýyna ne sebep
PETROPAVL. KAZINFORM – Petropavlda jarty aıdyń ishinde osymen ekinshi ret kóshede ósip turǵan aǵash qulady.
Petropavl qalalyq turǵyn úı-kommýnaldyq sharýashylyǵy bóliminiń málimetinshe, bul joly Nursultan Nazarbaev kóshesi, 87 mekenjaıy mańynda aǵash opyrylyp túsken. Oqıǵa saldarynan jol jıeginde turǵan jeńil kólik aıtarlyqtaı zaqymdandy.
Qazirgi ýaqytta tıisti sala mamandary jumys júrgizip, aǵashtyń qulaý sebepterin anyqtap jatyr. Al zaqymdanǵan kólik ıeleri táýelsiz sarapshylardy shaqyryp, shyǵyn mólsherin anyqtaıdy. Keıin sotqa júginbek.
Petropavldaǵy botanıkalyq baqtyń dırektory, dendrolog Artýr Rıazapovtyń aıtýynsha, jol jıegindegi aǵashtyń qulaýyna kósheni abattandyrý kezinde belgili bir talaptardyń saqtalmaýy sebep bolǵan.
- Oqıǵa ornyna baryp kórdim, aǵash shirip, zeń paıda bolǵan. Óıtkeni terektiń túbin oryn qaldyrmaı kespe tastarmen jaýyp tastaǵan. Saldarynan tamyryna aýa barmaı, ylǵal ketpeı shirigen.
Ekologııa jáne tabıǵa resýrstar mınıstrliginiń eldi mekenderdegi jasyl jelekterdi otyrǵyzý, kútip-ustaý jáne qorǵaý jónindegi qaǵıdalar boıynsha asfalt tóseý, tas tóseý, trotýarlar men joldardy plıtkamen jabý jumystary júrgizilgen kezde aǵashtyń túbinde dıametri keminde 1,2 metr bolatyn ashyq alań, ıaǵnı túp mańy qaldyrylýy kerek, - deıdi Artýr Rıazapov.
Mamannyń aıtýynsha, qurylys jumystary barysynda barynsha ósip turǵan aǵashqa zııan tımeıtindeı jaǵdaı jasalýy tıis. Máselen, jol, trotýar jáne basqa nysandardy salý nemese qaıta jańartý kezinde jasyl jelekter ornalasqan aýmaqta jer deńgeıin ózgertýge bolmaıdy.
Eger aǵash tamyrlaryn kómý nemese ashý mindetti bolsa, jobada aǵashtardyń qalypty ósýin saqtaıtyn arnaıy sharalar qarastyrylýy kerek.
- Ereje bolǵanymen, ony saqtaıtyndar neken-saıaq. Óıtkeni, ákimshilik quqyq buzýshylyq kodeksine engizilmegen. ıAǵnı, aıyppul qarastyrylmaǵan, - deıdi Artýr Rıazapov.
Osydan on shaqty kún buryn Petropavlda eki aǵash qulap, elektr baǵanyn zaqymdaǵan edi.
