Petropavlda kóshede 5 keli marıhýanamen ustalǵan er adam 10 jylǵa sottaldy
SQO polıtsııa departamenti baspasóz qyzmetiniń málimetinshe, «Qarasora» respýblıkalyq jedel-profılaktıkalyq is-sharasynyń maqsaty - esirtki jáne psıhotroptyq zattardyń zańsyz aınalymyn anyqtaý, jabaıy sorany zańsyz jetkizý arnalaryn jabý. Operatsııa 1 maýsymnan 31 qazanǵa deıin sozyldy. Nátıjesinde esirtki qylmysyna qatysty 125 zań buzýshylyq, sonyń ishinde esirtki ótkizý boıynsha 47 derek anyqtaldy. Polıtseıler esirtki saýdasymen kúreske erekshe mán beredi.
Operatsııa barysynda Petropavldyń ortalyq kósheleriniń birinde Jambyl aýdanynyń 39 jastaǵy turǵyny ustaldy. Polıtseıler onyń «Subaru Legacy» kóliginiń júksalǵyshynan 5 keli marıhýana salynǵan polımer paketti tárkiledi. Ustalǵan adam eki jyl boıy esirtki qoldanyp, satqanyn moıyndady.
Atalǵan fakti QR Qylmystyq kodeksiniń 297-babynyń 3-bóligi «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa deıingi tergep-tekserýdiń biryńǵaı tizilimine engizildi. 20 qyrkúıek kúni sottyń úkimimen er adam 10 jylǵa bas bostandyǵynan aıyryldy.
«Qarasora» jedel-profılaktıkalyq is-sharasy barysynda polıtsııa qyzmetkerleri zańsyz aınalymnan 295,5 kg astam túrli esirtki zatyn tárkiledi. Jyl basynan esirtki qylmysyna qarsy is-qımyl basqarmasynyń qyzmetkerleri esirtki bıznesi salasynda 195 túrli qylmysty anyqtady. Onyń ishinde 49-y esirtkini ótkizýge, 15-i asa iri kólemde saqtaýǵa qatysty. 409,5 kg esirtki tárkilendi, onyń 4,2 kg-nan astamy «sıntetıka» jáne 4,1 kg gashısh», - deıdi SQO polıtsııa departamenti bastyǵynyń orynbasary Rýslan Nazarov.
