Petropavlda qos azamattyǵy bar er adamǵa 690 myń teńge aıyppul salyndy

Petropavl stantsııasynda «Kıslovodsk-Tynda» baǵytyndaǵy jolaýshylar poıyzyn tekserý barysynda qos azamattyǵy bar er adam anyqtaldy. QR zańnamasyn buzǵan oǵan 690 myń teńge aıyppul salyndy, dep habarlaıdy Kazinform.

Kóliktegi polıtsııa departamentiniń málimetinshe, Petropavl stantsııasyndaǵy Jelilik polıtsııa bóliminiń qyzmetkerleri QR Ulttyq qaýipsizdik qyzmetiniń shekara qyzmetimen birlesip «Kıslovodsk-Tynda» baǵytyndaǵy jolaýshylar poıyzyn tekserý barysynda quqyq buzýshyny anyqtady. Reseıdiń 72 jastaǵy azamaty Qazaqstan Respýblıkasynyń azamattyǵy týraly zańnamasyn buzǵan.

Kólik polıtseıleri oǵan qatysty QR Ákimshilik quqyq buzý týraly kodekstiń 496-babynyń 2-bóligi, ıaǵnı QR zańnamasynda belgilengen merzimde shetel azamattyǵyn alý faktisin habarlamaý boıynsha ákimshilik hattama toltyrdy. Materıal Petropavl qalasynyń ákimshilik quqyq buzýshylyqtar jónindegi mamandandyrylǵan sotyna joldandy.

Sot sheshimimen er adamǵa 200 AEK, ıaǵnı 690 000 teńge mólsherinde aıyppul salyndy.
Jalpy jyl basynan beri Kóliktegi polıtsııa departamentiniń qyzmetkerleri QR Kóshi-qon zańnamasyn buzǵany úshin 1307 sheteldik azamatty ákimshilik jaýapkershilikke tartty, onyń ishinde sot sheshimi boıynsha 275 sheteldik elden shyǵaryldy. Qos azamattyǵy bar 159 adam anyqtalyp, olarǵa tıisti sharalar qoldanyldy.