Petropavlda Kórpefest festıvaline Reseıden qandastar keldi
«Kórpefest – 2022» halyqaralyq festıvali «Baqytty otbasy» memlekettik baǵdarlamasy aıasynda Qyzyljar óńirinde alǵash uıymdastyrylyp otyr. Tegin ótetin is-shara negizinen kóp balaly analardy, múmkindigi shekteýli jandardy qamtyǵan jáne jalpy tiginshilikti meńgerip, óz isin ashsam degen jandarǵa arnalǵan.
«Bul qazaq áıelderiniń, qyz-kelinshekterdiń erekshe kútetin festıvali, búgin Soltústik Qazaqstan oblysyna jetti. Bul is-sharaǵa búldirshin qyzdardan bastap, apa-ájelerimizge deıin, basqa ulttar da qatysyp jatyr. Reseıdiń Túmen, Omby oblystarynan qandastar keldi. Aralarynda qoldaryna múldem ıne ustamaǵandary da bar. Prezıdentimiz Qasym-Jomart Kemeluly sońǵy Joldaýynda halyqtyń tabysyn, ál-aýqatyn kóterýdi mindettedi. Qyzdar osy jerde úırengenderin ári qaraı jalǵastyryp, óz shańyraqtarynda otbasymen kásibin asha alady. Osy jerde topty jaryp shyqqan qyzdarǵa áleýmettik jelidegi paraqshamda jarnamasyn jasap, búkil respýblıkaǵa tanytqym keledi.
Jalpy qolónerge tabys kózi emes – ǵasyrlar boıy qalyptasqan, kóshpendilerdiń, ata-babamyzdyń rýhanı tájirıbesi. Bul kásipti úırengen qyzdyń sanasy, bolmysy, turǵan turysy, kıimi, tipti sóılegen sózine deıin ózgeredi. Ári ketse bir aptanyń ishinde bizdiń qyzdarymyzdyń etegi uzaryp, sóılegen sózderi durystalyp, sondaı bir úılesim tabady. Qyzdyń namysy – ulttyń namysy ǵoı. Kez kelgen qoǵamnyń jalaýy – ana. Sondyqtan da eń birinshi qoıylǵan maqsat – qazaq áıeliniń bolmysyn jańǵyrtý», - deıdi joba avtory, etnodızaıner, «Baqytty otbasy» memlekettik baǵdarlamasynyń tóraıymy Yrza Tursynzada.
Sheberlik saǵatyn ótkizgen sheberlerdiń arasynda 8 jasar Jannur Dúısen de bar. 5 jasynan qolyna ıne-jip alǵan elordalyq búldirshin qazir tikken buıymdaryn satyp, aıyna 120 myń teńge tabys tabady eken.
«Maǵan mynadaı dopty tigip shyǵýǵa 30 mınýt ýaqyt kerek. Tigýdi anamnan úırendim. Qazir quraq qurap, kórpeler de, qyz jasaýyn da tigemin», - deıdi kishkentaı sheber.
Jaınagúl Temirhanova Petropavl turǵyny. Ol óz tutynýshylary bar qalyptasqan tiginshi. Oblys ortalyǵynda bilikti mamandardyń sheberlik saǵaty ótetinin estip, bul múmkindikti qalt jibermeýge tyrysqan.
«Pandemııa bastalǵanda qolyma ıne-jip aldym. Eń alǵashqy kórpemdi anama arnap tiktim. Nátıjesin sýretke túsirip, áleýmettik jelige salyp edim, qyzyǵyp, tapsyrys bergender boldy. Bıyl úshinshi jylǵa aıaq basty, sońǵy eki jylda 150-ge jýyq dúnıe tikken ekenmin. Ol – qyz jasaýyna arnalǵan kórpe-jastyqtar, dıvan japqyshtar, balalar jamylǵysy. Bilgenim bir toǵyz, bilmegenim toqsan toǵyz. Únemi sheberlikti jetildirip otyrǵan jón, óıtkeni munda da tehnologııa, sán únemi ózgerip otyrady», - deıdi Jaınagúl Temirhanova.
Al petropavldyq dızaıner-modeler Zarına Chernıaeva festıvalge óz shákirtin erte kelipti. ıÝlııa Penıgına Daýn sındromymen týylǵan. 26 jastaǵy boıjetken eki aıdan beri is tigýdi úırenip júr.
«ıÝlııa maǵan eki aı buryn keldi. Іs tigý arqyly qol motorıkasyn jetildiredi, ol sóıleýine, qımyl-qozǵalysyna áser etedi. Nátıjesi bar. Qazir ózi kóılek tige alady. Bul jerde biz kórpe tigýdi úırengeli keldik. Kıim tikkennen keıin kóp qaldyq qalady. Djınsy materıalyn kádege jaratqymyz keledi. Sondaı-aq ıÝlııa ekeýimiz kórpe tigip, Born Nomad jalpyulttyq baıqaýyna qatyspaq nıettemiz», - deıdi Zarına Chernıaeva.
Sheberlik saǵattaryn áleýmettik jeli arqyly onlaın tamashalaýǵa da múmkindik bar. Al topty jaryp shyǵyp, belsendilik tanytqandarǵa tigin mashınalary jáne baǵaly syılyqtar beriledi. «Kórpefest – 2022» festıvalin qoldan tigilgen ulttyq buıymdar kórme-jármeńkesi qorytyndylamaq.
