Petropavlda kópqabatty úılerdiń úshten birine jýyǵy gazben qamtylmaǵan
PETROPAVL. QazAqparat – Petropavlda kóp qabatty úıde bolǵan jarylysqa qatysty qala ákimi Bolat Jumabekov pen Soltústik Qazaqstan oblysy tótenshe jaǵdaılar departamentiniń basshysy Ramıl Kamalov brıfıng ótkizdi, dep habarlaıdy QazAqparat tilshisi.
Petropavl qalasynyń ákimi Bolat Jumabekovtyń aıtýynsha, jarylys bolǵan ǵımarat 1971 jyly salynǵan. 103 páter bolǵan. Oqıǵa ornynda kesheden beri mamandar jumys istep, shyǵyn kólemin eseptep jatyr.
«Saǵat tańǵy 11.00 shamasynda ǵımaratta qandaı jumys atqarylýy kerek, ne jóndelip, neshe tereze salynýy qajet ekenin bildik. Saraptama jasalyp jatyr. Búginde 6 qurylys kompanııasy tıisti qalpyna keltirý jumystaryn atqarýǵa ázir. Bul maqsatqa bıýdjette qarajat bar. Sondaı-aq demeýshiler de kómektesip jatyr. Qysqa ýaqytta jóndeý jumystaryn bastap, aıaqtaýǵa tyrysamyz», - deıdi Bolat Jumabekov.
Jóndeý jumystary aıaqtalǵanǵa deıin turǵyndar týǵan-týystaryn panalaıdy. Bara jeri joqtarǵa jergilikti ýnıversıtettiń jataqhanasynan oryn berildi, ystyq tamaqpen qamtyldy. Qazir onda 40 adam turyp jatyr. Qala ákiminiń aıtýynsha, turǵyndardyń baspanalary baǵalanyp, keıin kelgen shyǵyn mólsheri ótelmek.
Bes qabatty burynǵy jataqhananyń birinshi qabatynda negizinen kásipkerlik sýbektileri bolǵan. Sonyń ishinde eki dámhana, shashtaraz jáne veterınarlyq klınıka.
SQO TJD bastyǵy Ramıl Kamalovtyń aıtýynsha, nysandardyń aýmaǵy 1,5 myń sharshy metrge jetpeıdi, sol sebepti órt qaýipsizdigi talaptarynyń qanshalyqty oryndalyp jatqanyn zań boıynsha tekserýge quqyqtary joq.
«Tótenshe jaǵdaı kezinde 2 dámhanadan 7 gaz ballony shyǵaryldy. Negizinen 27 lıtrlik turmystyq ballondar. Sonyń bireýi jarylǵan boldy. Jalyn taraǵan 1-2 qabattaǵy páterlerden de gaz ballondary shyǵaryldy», - deıdi Ramıl Kamalov.
Jalpy Petropavlda qazirgi ýaqytta 1150 kópqabatty úı bolsa, sonyń 333-i ortalyqtandyrylǵan gaz berý jelisine qosylmaǵan. Olar negizinen eki qabatty úıler.
Brıfıngte zardap shekkenderdiń qazirgi jaǵdaıy da aıtyldy.
«Qazir emdeý mekemelerinde 8 adam em alyp jatyr. Jansaqtaý bólimshesinde jatqan eki jigit bas-mı jaraqatyn alǵan, olarǵa búginde ota jasalyp, jaı palataǵa aýystyryldy. Qazir jansaqtaý bólimshesinde 20 jastaǵy bir qyz jatyr. Onyń denesiniń 65 %-yn kúıik shalǵan. Qalǵandary túrli jaraqat alǵan, jaǵdaılary ortasha», - deıdi SQO TJD basshysy Ramıl Kamalov.
