Petropavlda kópqabatty úılerdiń 11 kireberisi karantınge jabyldy
PETROPAVL. QazAqparat – Petropavlda kópqabatty úılerdiń 11 podezdi karantınge jabyldy, dep habarlaıdy QazAqparat tilshisi.
Óńirlik kommýnıkatsııalar qyzmetinde ótken brıfıngte Petropavl qalasy ákiminiń orynbasary Asqar Habıbýlın bul podezderge azyq-túlikti jetkizýmen eki sýpermarket aınalysatynyn aıtty.
«Sýpermarketterdiń qazirgi ýaqytta tapsyrysy kóp, úlgermeı jatyr. Sol sebepti ár kireberiske volonterlerdi bekittik. Olar tapsyrysty qabyldap, sýpermarkettermen jumys isteıdi. Turǵyndardyń qajetin jetkizip beredi», - dedi Asqar Habıbýlın.
Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi baspasóz qyzmetiniń málimetinshe, karantındegi podezderdiń árqaısysynyń janyna qoqys konteınerleri ornatyldy. Sanıtarlyq qyzmetter úılerdiń kireberisin tolyq dezınfektsııalady. Qazir ár podezdiń janynda tártip saqshylary kezekshilik atqarýda.
Buǵan deıin koronavırýs ınfektsııasynyń taralýyna tosqaýyl qoıý maqsatynda Petropavl qalasynyń alty aýmaqqa bólingenin habarlaǵan edik.
6 sáýir saǵat 21.30 jaǵdaı boıynsha óńirde qaýipti indetti juqtyrýdyń 25 deregi tirkelgen. Búgin oblysta ınfektsııa juqtyrǵan bir adam jazylyp shyqty.
