Petropavlda kópqabatty úıdiń terezesinen qulaı jazdaǵan bala qutqaryldy
ASTANA. QazAqparat - Petropavl qalasynda órt sóndirýshi kópqabatty úıdiń terezesinen qulap kete jazdaǵan 3 jasar balany qutqaryp qaldy, dep habarlaıdy QazAqparat tilshisi.
SQO ІІD-niń baspasóz qyzmetinen málim etkendeı, búgin saǵat 14:10 shamasynda polıtsııaǵa Jabaev kóshesindegi úılerdiń birinde terezeniń shybyn-shirkeıge qarsy toryna súıenip turǵan kishkentaı bala týraly habar tústi. Tártip saqshylary birden Jabaev kóshesindegi jaqyn mańdaǵy órt sóndirý bólimine dereý habar bergen.
«Oqıǵa ornyna birden órt sóndirý bóliminiń kezekshi qaraýyly shyqty. Arada birer mınýttyń ishinde kópqabatty turǵyn úıdiń terezesine avtobaspaldaq kerile tartylyp, baspaldaqpen joǵary bólimshe komandıri - azamattyq qorǵanys starshınasy Qazybek Ǵapbasov kóterildi. Joǵary shyǵyp kele jatyp, ol balany barynsha tynyshtandyryp kele jatqan edi. Osylaısha, bári ishteı qobaljyǵan sátte Qazybek Ǵapbasov oryndyqqa shyǵyp alǵan úsh jasar qyz balany qutqaryp aldy», - delingen habarlamada.
Qazybek Ǵapbasovtyń aıtýynsha, baldyrǵan qoryqpas úshin órt sóndirýshi basyndaǵy arnaıy baskıimin sheship shyqqan.
«Ádette, jazdygúni páter syrtynan qulyptalyp, tereze ashyq qalady. Sondyqtan, qurmetti ata-analar abaı bolyńyzdar», - deıdi Qazybek Ǵapbasov.
