Petropavlda kópqabatty úıden órt shyǵyp, 5 bala qutqaryldy
PETROPAVL. QazAqparat - Petropavlda bes qabatty turǵyn úıden órt shyqty, dep habarlaıdy QazAqparat.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, órt sóndirýshiler kelgenge deıin 4-qabattaǵy páter men balkondy qyzyl jalyn sharpyp úlgergen. Kireberisti qoıý tútin tumshalaǵan. Tilsiz jaý úıdiń shatyryna deıin jaıylýy múmkin edi.
«Shuǵyl túrde turǵyndardy gaz-tútinnen qorǵaý qyzmetiniń kúshimen syrtqa shyǵarý jóninde sheshim qabyldandy. Tómengi qabattaǵy turǵyndar óz betinshe syrtqa shyqty. Al joǵarǵy qabattaǵy adamdardyń tómenge túsýge múmkindigi joq - dálizdi qoıý tútin jaılap alǵan. Olar órt sóndirýshilerdiń tynys alý apparatyna jalǵanǵan arnaıy qutqarý kapıýshonynyń kómegimen evakýatsııalandy. Eń qıyny, syrtqa alyp shyqqan halyqtyń kópshiligi - áıelder men balalar edi», - dep málim etti TJD baspasóz qyzmeti.
Barlyǵy 16 adam evakýatsııalanyp, 6 adam qutqaryldy, onyń beseýi - bala. Barlyǵyn jedel járdem qyzmetkerleri qarap shyqty. Eshkim aýrýhanada emdelýdi qajetsingen joq.
Órt shyǵýynyń aldyn ala sebebi - elektr symynyń qysqa tuıyqtalýy. Tilsiz jaý saldarynan balkon tutastaı janyp ketti, qonaq bólme, jeke zattar jáne úı jıhazy búlingen. Naqty sebep jáne kelgen zardap kólemi anyqtalyp jatyr.
