Petropavlda kópqabatty úıde órt shyǵyp, 68 adam qaýipsiz jerge shyǵaryldy
PETROPAVL. QazAqparat – Petropavlda kópqabatty úıdiń jertólesinde órt shyǵyp, mamandarǵa turǵyndardy jáne dúken qyzmetkerlerin qaýipsiz jerge shyǵarýǵa týra keldi, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqıǵa 21 qyrkúıek kúni Petropavldaǵy Abaı kóshesi, 69 mekenjaıynda bolǵan. Saǵat 12:15 mınýt ketkende vedomstvonyń jedel basqarý ortalyǵyna 4 qabatty úıdiń jertólesinde órt shyqqandyǵy týraly habar túsedi. Oqıǵa ornyna birden úsh órt sóndirý bólimsheleriniń qyzmetkerleri jáne jedel-qutqarý otrıady attandy.
Oqıǵa ornyna kelgen mamandar órttiń jertóledegi 8 sharshy metrlik bólmeden shyqqanyn anyqtaǵan. Kúsh alǵan jalyn ventılıatsııalyq shahtamen sol úıge japsarlas salynǵan «Orbıta» dúkenine jaıylǵan, qabyrǵalary men edeni jana bastaǵan eken.
Qutqarýshylar aldymen úıden 68 adamdy, sonyń ishinde 8 balany evakýatsııalady. Jalynmen kúreske 9 tehnıka men 25 maman jumyldyryldy. Órtti tek 4 saǵattan keıin ǵana tolyq sóndirý múmkin boldy. Óıtkeni órt sóndirýshilerge jyqpyl-jyqpyly kóp, ári turǵyndardyń zattary tolyp turǵan jertólede jumys isteý ońaı bolmady.
Qaza tapqandar men zardap shekkender joq, kelgen shyǵyn mólsheri anyqtalatyn bolady.
Aldyn ala boljam boıynsha, órt sol arada jumys istegen «bolgarka» quralynan ushqan ushqynnan shyǵýy múmkin.
