Petropavlda kópqabatty ár úshinshi úı ǵana basqarýdyń jańa formasyna kóshti

PETROPAVL. QazAqparat – Páter ıeleri kooperatıvterinen bas tartyp, úıdi basqarýdyń jańa formasyna kóshýge nebary 3 aı qalsa da, Petropavlda bul jumys baıaý júrip jatyr, dep habarlaıdy QazAqparat tilshisi.

Petropavl qalasynyń ákimi Rýslan Ańbaev turǵyndarmen kezdesýde kópqabatty úıdi basqarýdyń jańa formasyna kóshýdiń mańyzdylyǵyn eske saldy.

1 shildeden bastap Páter ıeleri kooperatıvteri jumysyn toqtatady. Alaıda turǵyndar tańdaý jasaýǵa asyǵar emes. Máselen Petropavlda 1073 kópqabatty turǵyn úı bar, sonyń tek 367-sinde, ıaǵnı 30 % ǵana múlik ıeleri birlestigi tirkelgen.

«Turǵyn úı-kommýnaldyq sharýashylyǵyn jańǵyrtý baǵdarlamasyna da toqtala ketsem. Birneshe jyldan beri jumys istep kele jatqan memlekettik baǵdarlama aıasynda byltyr 18 kópqabatty úıde kúrdeli jóndeý júrgizildi. Osy maqsatqa 1 mlrd teńge jumsaldy. Bıyl jospar boıynsha 4 kópqabatty úıde shatyry aýystyrylyp, 5-eýinde 20 lıft aýystyrylmaq.

Baǵdarlamaǵa qatysý úshin qala ákimdigine kelip, ótinish qaldyrý qajet. Biz ony tıisti organdarǵa jiberemiz. Respýblıkalyq bıýdjetten qarajat bólingennen keıin jumys bastalady.

Oǵan qatysý úshin turǵyndardyń ortaq sheshimi kerek», - deıdi Rýslan Ańbaev.

Sonda-aq bıyl Petropavldyń aýlalaryna balalarǵa arnalǵan 20 oıyn kesheni jáne sporttyq trenajerlerdiń 30 kesheni ornatylmaq. Turǵyndar kezekti qalalyq ákimdiktiń resmı saıtynan bile alady.

«Alańdarǵa keshenderdi ornatý jumystary belsendi turǵyndardyń jáne múlik ıeleri birlestikteriniń qatań qadaǵalaýymen júzege asýy tıis. Keıin jumysty qabyldap alatyn da MIB tóraǵalary. Jańadan paıdalanýǵa berilgen oıyn alańdary MIB-ke senimgerlik basqarýǵa beriledi. Sondyqtan tóraǵalar da, turǵyndar da onyń búlinbeýine jaýapkershilikpen qaraýlary tıis», - deıdi qala ákimi.