Petropavlda kópqabatty 12 úı ǵana jylytý maýsymyna daıyn

PETROPAVL. QazAqparat – Petropavl qalalyq ákimdiginde qysqy jylytý maýsymyna ázirlik barysy talqylandy, dep habarlaıdy QazAqparat tilshisi.

Qalalyq ákimdiktiń baspasóz qyzmetiniń málimetinshe, oblys ortalyǵynda jylytý maýsymyna ázirlik qujatyn ázirshe tek 12 kópqabatty úı ǵana aldy. Búginge deıin 200-den astamynyń ǵana jylytý júıesi jýylyp, tazalandy.

Mamandardyń aıtýynsha, Petropavl qalasynda jylda 200-deı turǵyn úı qysqa tıisinshe daıyndalmaıdy. Onyń birneshe sebebi bar. Bul kópqabatty baspanalarda páter ıeleri kooperatıvi joq nemese olar óz jumystaryna salǵyrt qaraıdy.

«Jylýdy keshiktirmeı der kezinde berý úshin qazirden bastap úılerdi ázirleý qajet. Byltyr 750 úı daıyndalǵanymen, ázirlik qujatyn tek 150-i ǵana aldy. Bul - óte tómen kórsetkish. Qala ákimi Bolat Jumabekov tıisti qyzmetterge jaǵdaıdy jaqsartýdy tapsyrdy. Kommýnaldyq qyzmetter júrgizip jatqan jóndeý jumystaryn aldaǵy aıda aıaqtaýy tıis», - dedi baspasóz qyzmetinde.

Petropavl qalasyndaǵy kópqabatty úılerdiń sany – 1086. Jylytý maýsymy ádette qyrkúıek aıynyń sońynda bastalady.