Petropavlda kópqabatty birneshe úıdiń jertólesin kárizden kelgen las sý basty
PETROPAVL. KAZINFORM – Petropavlda kópqabatty birneshe úıdiń jertólesin kárizden kelgen las sý basty. Kommýnaldyq apattyń týýyna káriz júıesine tastalǵan qoqys sebep bolǵan.
Petropavl turǵyny Baqyt Esimǵalıevanyń aıtýynsha, jaz bastalǵaly úshinshi ret úıleriniń jertólelerin sý basqan. Kúlimsi ıis joǵary qabattaǵy páterlerge deıin jetip otyr.
«Munyń aldynda 25 shilde kúni osyndaı apat boldy. Ol kezde tórt kún jaryqsyz, sýsyz otyrdyq. Tońazytqyshtaǵy búkil etimiz, qysqa dep jınaǵan jemis-jıdegimiz – bári búlindi. Tórtinshi qabatta turamyn, ıis bizge de jetti. Qazir de elektr qýatynan ajyratady dep jatyr», - deıdi qala turǵyny.
Kommýnaldyq apat Petropavldaǵy Abaı-Nazarbaev kósheleriniń qıylysynda ornalasqan kollektorda bolǵan. Bıyl ol kóktemnen beri aýystyrylyp jatyr. 1966 jyly salynǵan nysannyń tozyǵy jetken.
«Qazirgi ýaqytta Abaı kóshesindegi káriz kollektory jańǵyrtylyp jatyr. Bul kollektorǵa Petropavldyń ortalyǵyndaǵy jáne Benzostroı, Jumysshy kenti, Vokzal alańy aýdanynan aǵyn sýlar kelip quıylady. Búginge deıin 1,8 km jýyq qubyr aýystyryldy. Dıametri 800 mm qubyr qoıyp jatyrmyz. Kollektordy bir kúnge de toqtatqan joqpyz, sol sebepti eki sorǵy jumys istep tur. Úılerde sý bar, káriz júıesi jumys istep tur. Búgin túnde kollektor sýly maılyq, túrli shúberek, qoqyspen bitelip, sol sebepti túnde brıgadalar jumys istep, tazalady. Qazirgi ýaqytta kollektor shtattyq rejımde jumys istep tur», - deıdi «Qyzyljar sý» JShS bas ınjeneri Andreı Fomıchenko.
Mamannyń aıtýynsha, kópqaatty úılerdiń jertólesine kirgen sýdy sorǵyzýǵa kásiporynnyń brıgadalary jumyldyrylady.
«Turǵyndardan ótinip suraımyz, káriz júıesine qoqys tastamańyzdar. Jazda úsh ret osylaısha tazalaýǵa týra keldi. Bıyl jaz jaýyn-shashyndy, sý kollektorǵa quıylyp, ol sebepti kollektor deńgeıi de kóterilgen, bul da jumysty qıyndatyp jatyr. Jaryqty da, sýdy da sóndirmeımiz, turǵyndardan shydamdylyq tanytýdy suraımyz. Kollektordy aýystyrýǵa oblystyq qazynadan 700 mln teńge qarjy bólindi. Kollektordy sóndirmeı jóndeý ońaı emes. Sondyqtan osyndaı sátter anda-sanda bolyp turady. Merdiger kompanııa jumys istep jatyr, jalpy bul kollektorǵa qatysty naqty joba, ne jumystyń aıaqtalý merzimi kórsetilmegen. Kóktemde birinshi ret zaqymdandy, sodan beri jumys tótenshe jaǵdaı rejıminde júrip jatyr», - dedi Andreı Fomıchenko.
Mamannyń aıtýynsha, jalpy oblys ortalyǵyndaǵy káriz júıesiniń búginde 70 % tozǵan.
Buǵan deıin SQO Kásipkerlik jáne ındýstrııalyq-ınnovatsııalyq basqarmasyna jańa basshy taǵaıyndalǵanyn jazǵan edik.
