Petropavlda kópes Shamsýtdınovtiń úıi qalpyna keltirilmek
PETROPAVL. QazAqparat - Petropavlda kóne ǵımarattardyń biri - kópes Shamsýtdınovtiń saýda úıi qalpyna keltirilmek. Soltústik Qazaqstan oblysynyń ákimi Qumar Aqsaqalov menshik ıesimen kezdesip, Petropavldyń arhıtektýralyq murasyn jazdan qaldyrmaı kúrdeli jóndeýden ótkizý jóninde tapsyrma berdi, dep habarlaıdy QazAqparat tilshisi.
SQO Tarıhı-mádenı muralardy saqtaý ortalyǵynyń málimetinshe, ǵımaratty kópes Shamsýtdınov 1915-1916 jyldary saýda úıi retinde salǵyzǵan. 1917 jyldan keıin ǵımaratta kóptegen memlekettik mekemeler: 1930-1960 jyldary kompartııanyń oblystyq komıteti, 1970-1990 jyldary oblystyq aýrýhana ornalasty. Qazirgi ýaqytta bul úı jekemenshiktiń qolynda.
«Bizge deıingi ǵımarattyń ıesi bul jerde 30 jyldaı eshteńe istemegen. Qańyrap bos turdy. Qazirgi jaǵdaıy óte nashar, tek qabyrǵalary ǵana qalǵan. Biz almatylyq kompanııamen birge eskız jobasyn jasadyq. Ol fırmanyń eskertkishterdi qalpyna keltirýge ruqsaty bar. Qazir arnaıy mekemelerdiń kelisimin alysymen-aq qurylys jumystaryn bastaımyz», - deıdi «Semeınyı» saýda jelisiniń quryltaıshysy Andreı Isakov.
Ǵımarat eki qabatty, qyzyl kirpishten modern stılinde salynǵan. Mamandardyń aıtýynsha, bul úıden XIX ǵasyr men XX ǵasyrdyń sońyna tán sáýlet ónerin kórýge bolady.
Oblys ákimi Qumar Aqsaqalov Petropavldyń qaq ortasynda turǵan kóne ǵımarattyń qazirgi jaǵdaıymen tanysyp, onyń qazirgi ıesine úıdi jóndeýdi jaqyn arada bastaýdy tapsyrdy.
«Bıyl jazda bul ǵımaratta jóndeý jumystary bastalýy kerek. Eń aldymen syrtqy qasbeti durystalyp, terezeleri salynsyn. Turǵyndar qaladaǵy eń ádemi ǵımarattardyń biri bolǵan bul úıdiń jóndelip jatqanyn kórýi kerek», - dedi óńir basshysy.
Jeke kásipker Andreı Isakov qańyraǵan ǵımaratty saýda, oıyn-saýyq ortalyǵyna aınaldyrý úshin 1,5 mlrd teńgesin jumsamaqshy.
