Petropavlda kópbeıindi zamanaýı aýrýhananyń qurylysy bastaldy
Soltústik Qazaqstan oblysyna Eljan Birtanov QR Premer-mınıstri Asqar Mamın bastaǵan úkimettik top quramynda keldi.
SQO Densaýlyq saqtaý basqarmasynyń málimetinshe, aldymen mınıstr obylstyq perınataldyq ortalyqta medıtsına qyzmetkerlerimen kezdesken. Eljan Birtanovtyń pikirinshe, ár medıtsına qyzmetkeriniń jańa jyldan bastap júzege asatyn jańa reforma – mindetti áleýmettik saqtandyrý qorynyń protsesterin qoldaýy jáne túsinýi asa mańyzdy. Óıtkeni, MÁMS-tiń tabysty jumys isteýi jáne halyqtyń ony durys qabyldaýy eń aldymen dárigerlerge qatysty.
Kezdesýden keıin mınıstr oblystyq perınataldyq ortalyqtyń jumysymen tanysty. Qazirgi ýaqytta medıtsınalyq mekemede 52 dáriger jumys isteıdi. Jalpy shtatta 377 qyzmetker bar. Statsıonar 165 orynǵa shaqtalǵan. Oblystyq perınataldyq ortalyqtyń jumysyna mınıstr oń baǵasyn berip, dárigerlerdiń joǵary biliktiligin atap ótti.
Basqarmanyń baspasóz qyzmeti málim etkendeı, mınıstr keıin ortalyqta jergilikti BAQ-tyń bas redaktorlarymen kezdesý ótkizdi. Mindetti áleýmettik medıtsınalyq saqtandyrýdy engizý máseleleri áńgime ózegine aınaldy. Óz kezeginde jýrnalıster densaýlyq saqtaý reformasyna jáne densaýlyq saqtaý salasyndaǵy ózgeristerge qyzyǵýshylyq tanytty. Sondaı-aq oblysta dári-dármekpen qamtamasyz etý jáne medıtsına qyzmetkerleriniń tapshylyǵy máseleleri talqylandy.
E.Birtanov sondaı-aq Petropavldaǵy kópbeıindi aýrýhananyń kapsýlasyn salýǵa qatysty. Bul jobany Elbasy N.Á.Nazarbaev Qaýipsizdik keńesiniń otyrysynda usyndy. Aýrýhana - Petropavl qalasyndaǵy «Qyzyljar» jańa arnaıy ekonomıkalyq aımaǵynyń negizgi jobalarynyń biri. Densaýlyq saqtaý salasyndaǵy bul aýqymdy jobany túrik ınvestorlary júzege asyrady. Astanany eseptemegende, bul JCI júıesi boıynsha salynǵan Qazaqstandaǵy alǵashqy aýrýhana bolady.
Ortalyq medıtsına salasyndaǵy sapa men qaýipsizdiktiń halyqaralyq standartyna saı bolmaq. Aýrýhana sońǵy úlgidegi qondyrǵylarmen jabdyqtalady. Sondyqtan jergilikti 200 dáriger biliktiligin arttyrý úshin shetelde oqytylady. Aýrýhana 500 orynǵa shaqtalǵan.
E.Birtanov atap ótkendeı, SQO-da ashylatyn jańa kópbeıindi aýrýhana aımaqtyń densaýlyq saqtaý salasyna jańa serpin bermek. Al jańa ǵımaratqa kóshetin aýrýhanalardyń eski ǵımarattary ońaltý ortalyqtary retinde qoldanylmaqshy.
