Petropavlda kópbalaly múgedek áıel ınternet alaıaqtarǵa aldandy
PETROPAVL. QazAqparat – Petropavlda múgedek áıel, ári bes balanyń anasy telefon utysyna qatysamyn dep 69 myń teńgesinen aıyrylyp qaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, tártip saqshylaryna Petropavldaǵy Bereke yqshamaýdanynyń 41 jastaǵy turǵyny júgingen. Ol ınternet alaıaqtarǵa jem boldy.
Bes balanyń anasy ınternetten IPhone oınatylatyny týraly habarlandyrýdy oqyp, baǵyn synamaq bolady. Ol utys jeńimpazdarynyń qatarynda bar ekeni habarlama alǵannan keıin syılyqty kútedi.
Uıymdastyrýshylarmen hat almasyp, olardan qulaǵynyń múkistigine baılanysty kez kelgen jańalyqty jazbasha habarlaýdy ótinedi. Alaıda onyń kópbalaly ana ekendigi de, múgedektigi de alaıaqtarǵa toqtaý salmaǵan.
Birer kúnnen keıin «uıymdastyrýshylar» habarlasyp, shekaradaǵy jaǵdaıǵa baılanysty poshta shyǵyndaryn óteý qajettigin jazady. Olar talap etken somany jibergennen keıin de, alaıaqtar áıeldi taǵy da eki ret aqsha aýdarýǵa ıtermelegen.
Osylaısha, aýdarylǵan aqshanyń jalpy somasy 69 myń teńgeni quraǵan. Onyń kúdigin seıiltý úshin alaıaqtar kýrer jolda kele jatyr dep jalǵan beıne jáne foto jibergen.
Sonyń ishinde ushaqtaǵy jolaýshylardyń fotolary da bar.
Qazirgi ýaqytta atalǵan fakti «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine engizildi.
SQO PD bastyǵynyń orynbasary Rýslan Nazarov eshkimge qandaı jaǵdaı bolmasyn qupııa sózdi, bank kartalarynyń, onlaın-bankıng, áleýmettik jelidegi jeke akkaýnttyń kodtaryn bermeýdi, messendjer arqyly jeke qujattardyń fotosyn jibermeý kerektigin eskertedi. Al ınternet-alaıaqtardyń qurbanyna aınalǵan jaǵdaıda dereý polıtsııaǵa júginý qajet.
Aqerke Dáýrenbekqyzy
