Petropavlda kóp qabatty úıden órt shyǵyp, eki áıel zardap shekti
PETROPAVL. QazAqparat – Petropavlda bes qabatty úılerdiń birinde órt shyǵyp, ıis tıip ýlanǵan eki áıel aýrýhanaǵa tústi, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavldaǵy Pýshkın kóshesi, 43 mekenjaıda ornalasqan bes qabatty turǵyn úıde órt shyqty.
Oqıǵa ornyna órt sóndirý qyzmetiniń 3 avtotsısternasy jáne 3 arnaıy kóligi men jeke quramnan 21 adam jetti. Olar birden iske kirisip, órt shyqqan ǵımarattan turǵyndardy shyǵardy.
«Órt úıdiń ekinshi qabatyndaǵy páterlerdiń birinen shyqqan eken. Onyń ıesi áıel biz kelgende dalada júrdi. Nysan tútinge oranǵandyqtan, turǵyndardy qutqarýǵa týra keldi. Demalý apparattary men qabyn qoldanyp 5 adamdy alyp shyqtyq. Sondaı-aq taǵy 25 adam qaýipsiz jerge shyǵaryldy. Jergilikti atqarýshy organdar oqıǵa ornyna avtobýstardy aldyrtty. Úıden shyǵarylǵandardy qatty aıazda tońyp qalmaýy úshin birden osy kólikterge otyrǵyzdyq», - deıdi Petropavl qalalyq № 1 órt sóndirý bóliminiń bastyǵy Bolat Jumajanov.
Órt tolyǵymen sóndirildi. Órttiń shyǵý sebebi men kelgen shyǵyn mólsheri anyqtalatyn bolady.
Al tútinge tunshyǵyp, ýlanǵan 48-degi jáne 80-degi eki áıel emdeý mekemesine jetkizildi. Mamandardyń aıtýynsha, olardyń jaǵdaılary ortasha.
