Petropavlda kóp qabatty úı órtenip, 132 adam evakýatsııalandy
PETROPAVL. QazAqparat – Petropavlda kóp qabatty turǵyn úıde órt shyǵyp, mamandar eki adamdy qutqardy, 132 adamdy qaýipsiz jerge shyǵardy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, búgin saǵat 19.37-de «101» nómirine Petropavldaǵy N.Nazarbaev kóshesi, 225 mekenjaıyndaǵy turǵyn úıde órt shyqqandyǵy jóninde habarlama túsken. Bes qabatty bul úı buryn jataqhana bolǵan, bir ǵana kireberisi bar, uzyn dálizdi ǵımarat. Jalyn ekinshi qabattaǵy páterlerdiń birinen shyqqan.
Órt sóndirýshiler oqıǵa ornyna 3 mınýtta jetti. Olar baspaldaqty qoldanyp, eki adamdy qoıý tútinniń ishinen alyp shyqty. Taǵy 132 adam, sonyń ishinde 25 bala qaýipsiz jerge shyǵaryldy.
Al 20 mınýttyń ishinde jalyndy aýyzdyqtap, saǵat 20.21-de tolyq sóndirdi. Tilsiz jaýmen órt sóndirý qyzmetiniń 31 mamany kúresip, 9 tehnıka jumys istedi. Ázirge órttiń neden shyqqany jáne shyǵyn mólsheri belgisiz.
