Petropavlda kóne shyrsha oıynshyqtarynyń kórmesi ótip jatyr
PETROPAVL. KAZINFORM — Petropavlda jańa jyl merekesi qarsańynda kóne shyrsha oıynshyqtarynyń kórmesi ótip jatyr. Kelýshiler nazaryna Aıaz atanyń ǵana 130-dan astam túri usynylǵan.
Erekshe kórmeni botanıkalyq baqta tamashalaýǵa bolady. Kollektsııanyń bir bóligi, osy oranjereıanyń negizin qalaýshy Rıazapovtar otbasyna tıesili.
— Meniń balalyq shaǵymnyń oıynshyqtary. Sol sebepti de maǵan óte qymbat. Mynaý GDR-de, shamamen 1970 jyly jasalǵan shyrsha da ótken kúnniń belgisi, biz ony kishkentaı kezimizde sıqyrly dep oılaıtynbyz. Óıtkeni astyndaǵy maı shamdardy jaqqanda aınalyp, syńǵyrlaıtyn. Ol ata-ájemniń úıinde saqtaldy. Qonaqqa kelgende qasynan shyqpaı tamashalaıtynbyz. Keıin, óskende bildik qoı, fızıka zańyna baılanysty aınalatynyn, — deıdi botanıkalyq baqtyń dırektory Artýr Rıazapov.
Kollektsııada shyrshanyń ushar basyna iletin juldyzshalar da bar. Onyń biri — qańyltyrdan jasalsa, endi birine steklıarýs qoldanylǵan.
— Eýropada shyrshalardyń basyna bant, súmbi taqsa, bizde únemi juldyzsha iletin. Ol kúsh-qýattyń belgisi. Sol sebepti áli de kúshtik qurylymdardyń keıbiriniń nyshandarynda osy belgini kórýge bolady, — deıdi Artýr Rıazapov.
Kórmede 1930 jyly shyǵarylǵan bes tarmaqty juldyz da tur. Ol «Moskabel» kásipornynyń ónimi.
Radıotehnıka men kabel jasaýǵa mamandandyrylǵan zaýyt qaldyqtardan osyndaı túrli shyrsha oıynshyqtaryn jasaǵan eken.
Anna Lıashenko botanıkalyq baqtyń qyzmetkeri, túrli kóne buıymdardy jınaý onyń súıikti isi.
Qaz-qatar tizilgen, uzyn-qysqaly, uzyn sany qazir 130-dan asatyn Aıaz atalardyń músinshelerin ol jıyrma jyl jınaǵan eken.
— Aıaz atalardy balam týǵannan keıin jınaı bastadym. Shyrsha qurǵannan keıin astyna meniń balalyq shaǵymda bolǵan Aıaz atany qoıǵym keldi, osylaısha birinshi músinshe paıda boldy. Keıbirin satyp alamyn, endi birin týǵan-týys, tanystar syılaıdy. Qoqysqa laqtyryp tastaǵan jerinen taýyp ákelip, jónge keltirgen kezderim boldy. Olar ártúrli materıaldan jasalǵan: gıps, penoplast, kapron, plastık, presstelgen karton, maqta, aǵash jáne t. b. Taǵy bir ereksheligi, qazirgilermen salystyrǵanda óte myqty jasalǵan. Aıaz atalardyń bir bóligi Belarýstiń «Lých» fabrıkasynan shyqqan, Almatydaǵy Kalının fabrıkasynda jáne Ýkraınada jasalǵandary da bar. Olar bir-birine uqsamaıdy, kıimi, formasy, bet-álpetimen erekshelenedi, mysaly belarýstik Aıaz atalardyń betteri qyp-qyzyl bolyp turady, — deıdi Anna Lıashenko.
Kollektsıonerdiń armany — Aıaz atalardyń sırek kezdesetin túrlerin qolǵa túsirý, onyń bireýi keminde 200 myń teńge turady.
Al jańajyldyq oıynshyqtar kórmesi Petropavlda 15 qańtarǵa deıin jumys istemek.
Buǵan deıin SQO-da eldi mekender arasynda úılerin jańajyldyq bezendirýden baıqaý ótip jatqanyn jazǵan edik.
