Petropavlda kóne Qurandar kórmesi ótip jatyr — fotoreportaj
PETROPAVL. KAZINFORM — Petropavldaǵy Islam mádenıeti mýzeıinde erekshe kórme ashylyp, jurt nazaryna ǵasyrdan astam ýaqyt buryn basyp shyǵarylǵan qurandar usynyldy.
Kórmege kelýshiler 20-dan astam qurandy jáne ózge de kóne jádigerlerdi tamashalaı alady.
— Abylaıhan rezıdentsııasy mýzeı kesheniniń uıymdastyrýymen fılıal — Islam mádenıeti mýzeıinde kórme ótip jatyr. Bıyl bul mýzeıdiń ashylǵanyna eki jyl. Osy aralyqta 30-dan astam quran jınaldy. Sonyń eń kóne degenderin búgin shyǵaryp, kelýshilerge tanystyryp jatyrmyz. Maqsatymyz — dinge shaqyrý emes, qurannyń paıda bolý tarıhyn, jazbalardyń qanshalyqty mańyzdy ekenin kórsetý, — deıdi Abylaıhan rezıdentsııasy mýzeı kesheni dırektorynyń orynbasary Ásemgúl Qydbekova.
Sonyń biri — beti sarǵaıǵanymen qundylyǵyn joǵaltpaı, 134 jyl buryn baspadan shyqqan quran kitaby.
— Quran tórt baspamen shyqqan, birinshi arab baspasy, ekinshisi — Pákistan baspasy, túrik jáne tatar baspasy. Qazir mýzeıimizde osy tatar baspasynyń birinshi basylymda shyqqan nusqasy saqtalǵan. Bul kitap 1881 jyly shyqqan. Qurannyń barlyǵy bir maǵynada shyqqan. Bul qurandardy bizge turǵyndar ákelip tapsyryp jatyr. Sandyqta jatqan, ata-babasynan qalǵan, sony mýzeıge tegin syılady. Olardy biz osylaısha jurt nazaryna usynamyz jáne oqyp otyramyz, — deıdi Islam mádenıeti mýzeıiniń dırektory Murat Ámirjanov.
Kórmeden 1893, 1910, 1907 jylǵy kóne qurandardy da kórýge bolady. Al myna tasbıh 19 ǵasyrda qyshtan jasalǵan eken.
— Tasbıh 99 tastan turady. Nelikten? Allanyń 99 esimine baılanysty. Myna jádigerdi Iraktyń Baǵdad qalasyna jarylǵysh zattardy zalalsyzdandyrý jumysymen bizdiń Petropavldan barǵan jigit tapsyrdy. Ol meshitte jumys istep júrip, úıindilerdiń astynan tapqan eken. Soǵan rıza bolyp, meshittiń ımamy syılyqqa bergen. Bul tasbıhta ıAsın súresi jazylǵan. Buryn súreler aǵashtyń qabyǵyna, terilerge, qyshqa jazylǵan. Kópshilik ıAsın súresin úıdi tazalaýǵa, aýrý-syrqaýdan arylýǵa, til-kózden saqtaný úshin paıdalanady, — deıdi Murat Ámirjanov.
Altyn orda dáýirine jatatyn Qyzyl oba qorymynan tabylǵan jádigerlerdi de tamashalaýǵa bolady.
Petropavlda Islam mádenıeti mýzeıi 2023 jyly kúzde ashyldy.
Ǵımarattyń óz tarıhy bar, ol 1857 jyly meshit retinde salynyp, keıin jergilikti zaýyttyń qoımasy retinde paıdalanyp keldi.
Kúrdeli jóndeý barysynda nysannyń ózindik ereksheligi saqtalyp qaldy.
Buǵan deıin Syrymbettegi Shoqan mýzeıi jáne ǵalymnyń balalyq shaǵy ótken Aıǵanym qonysy jaıly jazǵan edik.
