Petropavlda kompanııalar membaǵdarlama aıasyndaǵy úılerdi salyp bitire almaı otyr
Soltústik Qazaqstan oblysy kásipkerler palatasy baspasóz qyzmetiniń málimetinshe, Petropavlda qurylys salasynda kezdesetin máseleler talqyǵa túsken óńirlik keńestiń jıyny ótken.
Kóterilgen basty problema - memlekettik tapsyrys, onyń ishinde bıýdjettik kóppáterli turǵyn úı salýda jáne oǵan ınjenerlik kommýnıkatsııalar tartýda birneshe kompanııa emes, tek bireýi ǵana aınalysýy qajet. ıAǵnı joba birtutas bolýy tıis.
«Biz, jergilikti kompanııalar, úılerdi saldyq, al olarda áli kúnge ınjenerlik jeliler men abattandyrý joq, óıtkeni bul jumysty basqa kompanııa atqarýy tıis. Osyǵan baılanysty biz qazir daıyn turǵan nysandardy kúzetip otyrmyz. Saldarynan kóktem kelgende biz onda qosymsha jóndeý jumystaryn júrgizýimiz kerek: qazir qajetti temperatýra rejımi bolmaǵandyqtan lınoleýmdy aýystyrýǵa, qabyrǵalaryn qaıta sylaýǵa májbúr bolamyz. Óıtkeni ınjenerlik kommýnıkatsııalar boıynsha jumystar bastalmaǵan nemese tolyq aıaqtalmaǵan. Bolashaqta mundaı jaǵdaı qaıtalanbas úshin bul máseleni sheshýimiz kerek», - deıdi óńirlik keńes múshesi, «Osnovanıe» JShS dırektory Sergeı Tımofeev.
Bul másele jergilikti bılikke tanys. Úılerdi tapsyrý merzimi keshikkendikten olar kezekte turǵandardy baspanamen qamtı almaı otyr.
Jergilikti bıýdjetke de áseri bar, barlyq nysan respýblıkalyq bıýdjetten qarjylandyrylǵanymen, ýaqytynda daıyn bolmaǵandyqtan qazynaǵa qosymsha júk túsedi.
«Bul bir sharshy metrdiń qunyn tómendetý jáne memlekettik baǵdarlamalar boıynsha salynǵan turǵyn úıdi arzandatý úshin jasalǵany túsinikti, biraq biz jergilikti bıýdjetten qarjy bólip aıaqtaýǵa májbúrmiz. Injenerlik kommýnıkatsııalardy tartýdy basqa óńirdiń kompanııalary konkýrsta jeńip alǵan. Olardyń qandaı fırma ekeni jáne meken-jaılary bizge belgili. Bul kompanııalar jumysty atqaryp úlgermeı jatyr, biz olarmen birneshe ret kelisimshartty buzýǵa tyrystyq. Qazir olar túzetim jasaǵannan keıin biz olarmen kelisimshartty buzyp basqa konkýrs jarııalaımyz. Úıdiń qurylysy men onyń kommýnıkatsııasyn bir kompanııa atqarýy tıis, bolashaqta bul máselege jol bermeýge tyrysamyz», - deıdi Petropavl ákimi Rýslan Ańbaev.
Qala basshysynyń aqparaty boıynsha, Petropavlda úsh kompanııa bıýdjettik úılerge kommýnıkatsııa tartýmen aınalysady.
Onyń barlyǵy ózderine júktelgen mindetti oryndaı almaı otyr.
Qazirgi ýaqytta osy jobalardy aıaqtaýǵa jergilikti bıýdjetten shamamen 5 mlrd teńge bólindi.
«Aqpan aıynyń sońynda biz esep aıyrysyp, bul úılerdi Otbasy banki arqyly satýǵa qoıamyz. Sáýir aıynan bastap daıyn úılerge kiri bastaıdy. Biraq abattandyrý máselesi áli de sheshilgen joq», - deıdi qala ákimi.
