Petropavlda kolledj jataqhanasynda 8 adamnan temiretki anyqtaldy
PETROPAVL. KAZINFORM – Petropavldaǵy Maǵjan Jumabaev atyndaǵy joǵary kolledjdiń jataqhanasynda turatyn segiz adam «dene terisiniń dermatofıtııasy» bastapqy dıagnozymen aýrýhanaǵa jatqyzyldy.
Halyq arasynda temiretki dep atalyp ketken dermatofıtııa juqpaly aýrýǵa jatady.
Petropavl qalalyq sanıtarııalyq-epıdemıologııalyq baqylaý basqarmasynyń epıdemıologııalyq baqylaý bóliminiń basshysy Anara Kýrgýnbaevanyń aıtýynsha, 25 qyrkúıekte Kópbeıindi oblystyq aýrýhanadan segiz adamǵa «dene terisiniń dermatofıtııasy» bastapqy dıagnozy qoıylǵandyǵy týraly shuǵyl habarlama túsken.
Qazirgi ýaqytta ınfektsııanyń kózin jáne yqtımal berilý joldaryn anyqtaý maqsatynda kolledj ben onyń jataqhanasynda epıdemıologııalyq tergep-tekserý júrgizilip jatyr.
- Tekserý barysynda naýqastardyń jataqhananyń bir qabatynda turatyny, bólmeleriniń bir-birine jaqyn ornalasqany jáne olardyń arasynda tyǵyz turmystyq baılanys bolǵany anyqtaldy. Dıagnozdy naqtylaý úshin teri-venerologııalyq dıspanserde alynǵan patologııalyq materıalǵa zerthanalyq zertteý júrgizilip jatyr, - deıdi Anara Kýrgýnbaeva.
Qazirgi ýaqytta barlyq naýqas aýrýhanaǵa jatqyzylǵan. Sonymen qatar olardyń turǵylyqty jeri men oqý ornynda qorytyndy dezınfektsııa júrgizilgen. Mamannyń aıtýynsha, kolledj ben jataqhanada epıdemııaǵa qarsy jáne profılaktıkalyq is-sharalar ótkizý týraly qaýly shyǵaryldy.
- Naýqastarǵa emdeý kýrsy aıaqtalǵannan keıin bir aı boıy dınamıkalyq medıtsınalyq baqylaýda bolady. Osy kezeńde olardan baqylaý úshin taǵy eki ret zerthanalyq taldaý alynady, - deıdi Anara Kýrgýnbaeva.
Sanıtarııalyq-epıdemıologııalyq baqylaý basqarmasynyń málimetinshe, qazir ınfektsııanyń naqty kózi anyqtalǵan joq. Epıdemıologııalyq tergep-tekserý jalǵasyp jatyr.
Buǵan deıin Astanada pnevmonııamen 192 bala aýrýhanada em alyp jatqanyn jazǵan edik.
