Petropavlda kólik júrgizýshisi órttiń dúkenge taralýyna jol bermedi
PETROPAVL. KAZINFORM — Petropavlda kóshede jeńil kólik órtenip, kezdeısoq kýáger órttiń dúken men aıaldamaǵa taralýynyń aldyn aldy.
Oqıǵanyń beınejazbasy áleýmettik jelide tarady.
Vıdeodan órtenip, lapyldap janǵan jeńil kólikti ekinshi kóliktiń súıregenin kórýge bolady.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, 25 aqpan kúni saǵat 17:35–te «101» jedel nómirine Petropavldaǵy Jumysshy kentinde, Panfılov kóshesinde jeńil avtokóliktiń órtengeni týraly habarlama túsken.
Oqıǵa ornyna jedel jetken mamandar kóliktiń qozǵaltqysh bóliginen shyqqan órtti sóndirdi. Avtokólik gaz-ballon jabdyǵymen jabdyqtalǵan eken. Aldyn ala boljam boıynsha, órttiń shyǵýyna elektr symdarynyń qysqa tuıyqtalýy sebep bolǵan.
Keıin belgili bolǵandaı, kólik órt shyqqan kezde dúken mańynda turǵan. Kólik ıesiniń qolda bar quraldarmen órtti sóndirmek bolǵan áreketi nátıje bermegen.
— Sol sátte ótip bara jatqan jeńil kólik júrgizýshisi jaǵdaıǵa jedel áreket etip, janyp jatqan avtokólikti qaýipsiz jerge jyljytý týraly sheshim qabyldaǵan. Arqanmen tirkep, ol kólikti jol jıegine súırep aparǵan. Nátıjesinde órttiń dúken ǵımaratyna jáne janyndaǵy adamdar turǵan avtobýs aıaldamasyna taralýyna jol bermedi, — deıdi departament mamandary.
Al órt sóndirý jasaǵy kelgennen keıin júrgizýshi oqıǵa ornynan ketip qalǵan. Qazirgi ýaqytta onyń jeke basy anyqtalyp jatyr.
Buǵan deıin Aqtóbede «Ramazan» qus fabrıkasynyń qoımasy órtengenin jazǵan edik.