Petropavlda kólikti «skanermen» tonaǵan urylar ustaldy
ASTANA. QazAqparat - Petropavlda polıtsııa qyzmetkerleri arnaıy qurylǵymen avtokólikterdiń esigin ashyp, ishindegi aqshany urlap ketip júrgen eki er adam ustaldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Vedomstvonyń habarlaýynsha, oblys ortalyǵynda jaz aılarynan beri kóliktiń ishindegi aqshany urlaý oqıǵasy jıileı túsken. Bir qyzyǵy, urylar kóliktiń esigin buzylǵan eshqandaı belgi qaldyrmapty. Jedel qyzmetkerler isti zertteı kele urylardyń arnaıy qurylǵy - dabyl belgilerin skanerleýge arnalǵan grabbarmen urlyqty jasaǵanyn ańǵarǵan.
«Urlyqtardyń biriniń aqyry beti ashylyp, urylar qolǵa tústi. Ustalǵan kezde olardan sıgnalızatsııa túrlerin, uıaly telefondar men kóptegen sım-kartalardyń kodyn oqı alatyn skaner tárkilendi», - dep habarlaıdy vedomstvodan.
Qalalyq ІІB bastyǵynyń birinshi orynbasary Asan Meıramovtyń aıtýynsha, urylar Shájimbaev - Beıbitshilik kóshesiniń boıynda ustalǵan. Eki er adam birqatar avtokólikterdiń tonalýyna qatysty isterge kúdikti retinde ustalǵan. Olardyń biri Petropavl qalasynyń turǵyny bolsa, ekinshisi buryn sotty bolǵan Grýzııa eliniń azamaty bolyp shyqty.
«Anyqtalǵanyndaı, buryn sotty bolǵan sheteldik 29 jastaǵy petropavldyqpen birge belgili bir jospar arqyly áreket etken: onyń biri eshkimniń kelip qalmaýyn baqylap tursa, ekinshisi avtokólikti skanermen ashyp alyp, urlyq jasaǵan. Avtokólikterden tek aqshany urlap áketip otyrǵan. Basqa zattar olardy qyzyqtyrmaǵan. Ekeýi de ýaqytsha oqshaýlaǵyshqa qamaldy», - dep habarlaıdy SQO ІІD baspasóz qyzmetinen.
