Petropavlda kólik júrgizýshisin 150 myń teńgege aldaǵan eki polıtseıge aıyppul salyndy
PETROPAVL. QazAqparat – Petropavlda patrýl polıtsııasy batalonynyń eki qyzmetkeri alaıaqtyq jasap, kólik júrgizýshisinen 150 myń teńge alǵan, dep habarlaıdy QazAqparat tilshisi.
Soltústik Qazaqstan oblysynyń Sybaılas jemqorlyqqa qarsy qyzmeti Petropavl qalalyq polıtsııa basqarmasynyń patrýl polıtsııasy batalonynyń eki qyzmetkeri Aslan Qusaıynov pen Farhad Kákenovke qatysty qylmystyq iske usynymdy qarady. Іs-shara onlaın rejımde ótti.
«Sotqa deıingi tergeý barysynda belgili bolǵandaı, 24 sáýir saǵat 10.00 shamasynda polıtsııa ınspektorlary Qusaıynov pen Kákenov «Lada Vesta» qyzmettik kóligimen qoǵamdyq tártipti jáne jol qaýipsizdigin qamtamasyz etý maqsatynda qyzmetke túsedi. Patrýldeý barysynda olar Petropavldaǵy Batyr Baıan kóshesinde «Lada Largus» kóligin toqtatady. Eki polıtseı aldyn ala kelisim boıynsha onyń júrgizýshisi Hısmatýllınge joldyń qarsy betine shyǵyp ketip, jol júrý erejesin buzǵanyn aıtady. Júrgizýshi úzildi-kesildi bas tartqanymen, Qusaıynov pen Kákenov qyzmettik jaǵdaıyn paıdalanyp onyń 6 aıǵa júrgizýshi kýáliginen aırylatynyn aıtyp, qorqytady. Hısmatýlınniń abyrjyǵanyn paıdalanyp, odan 150 myń teńge talap etedi, al somany qyzmettik planshetke jazyp kórsetken», - deıdi SQO Sybaılas jemqorlyqqa qarsy qyzmet basshysynyń birinshi orynbasary Nurlan Jahın.
Hısmatýllın kólik júrgizý quqyǵynan aırylyp qalmaý úshin polıtseılerdiń suraǵan qarajatyn berýge májbúr bolǵan. Kóligine qaıtyp kelip, mashınasyndaǵy 100 myń teńgeni jáne kóliktegi tanysy Reznıkten 50 myń teńgeni qaryzǵa surap alyp, eki qyzmetkerge 150 myń teńgeni sanap beredi. Keıin kóliginiń qujattaryn qaıtaryp alyp, ketedi.
«Birazdan keıin Hısmatýllın polıtsııa qyzmetkerleriniń zańsyz áreket jasap, ózin aldaǵanyn túsinedi. SQO PD ózindik qaýipsizdik basqarmasyna kelip, aryzdandy. 24 sáýir saǵat 18.30-da Hısmatýllın arnaıy operatsııa barysynda Koshýkov jáne Sátpaev kósheleriniń qıylysyna kelip, Qusaıynov pen Kákenovten aqshasyn qaıtarýdy talap etedi. Ol ekeýi qylmystyq istiń jarııa bolýynan qorqyp, 150 myń teńgesin qaıtaryp berdi.
Sotqa deıingi tergeý barysynda qyzmetkerlerdiń portatıvti beınetirkegishterdi sóndirip tastaıtyny belgili boldy. Bul óz kezeginde Іshki ister mınıstriniń nusqaýyn buzý bolyp esepteledi», - deıdi Nurlan Jahın.
Petropavl qalalyq sotynyń úkimimen Aslan Qusaıynov pen Farhad Kákenovke alǵan somasynyń 10 ese artyq mólsherinde, ıaǵnı 1,5 mln teńgeden aıyppul salyndy. Olar «polıtsııa leıtenanty» jáne «polıtsııanyń aǵa leıtenanty» shenderinen jáne ómir boıyna memlekettik organdar men kásiporyndarda qyzmet etý quqyǵynan aıyryldy.
SQO polıtsııa departamenti bastyǵynyń orynbasary Qapez Dáýletbaevtyń aıtýynsha, bıyl qyzmetkerler arasynda sybaılas jemqorlyqqa qatysty 5 qylmystyq is qozǵalǵan. 9 qyzmetker jazaǵa tartyldy, ishki ister organdarynan shyǵaryldy.
