Petropavlda kólik júrgizýshisi qala kóshelerimen qashyp, jol polıtseılerin ábigerge saldy
PETROPAVL. QazAqparat – Petropavlda kólik júrgizýshisi qarbalas ýaqytta kólik qozǵalysy kóp qala kóshelerimen qashyp, jol polıtseılerin ábigerge saldy, dep habarlaıdy QazAqparat tilshisi.
Áleýmettik jelide patrýldik polıtsııa qýǵan, aq kólik júrgizýshisi qashqan vıdeonyń jazbasy tarady.
Kınodaǵydan kem túspeıtin qýǵyn barysynda aq kóliktiń ıesi birneshe ret joldyń qarsy baǵytyna shyǵyp ketti, eki jolaqty kesip ótti, kólik aǵynyna qarsy júrdi. Óziniń ǵana emes, basqalardyń densaýlyǵy men ómirine qaýip tóndirdi. Polıtseıler de sońynan qalmaı, aqyry quqyq buzýshyny ustap tyndy.
Óńir polıtseıleri kópshiliktiń qyzyǵýshylyǵyn tanytqan beınejazbaǵa qatysty túsinik berdi. Oqıǵa Petropavlda keshe bolǵan eken.
«10 tamyz kúni saǵat 18.27 mınýt ketkende Partızan-Nazarbaev kósheleriniń qıylysynda polıtseılerdiń nazaryna artqy bamperi joq «Toyota Corolla« kóligi túsedi. Jaǵdaıdy bilý úshin toqtatqan ınspektor kólik júrgizýshisinen spırttik ishimdiktiń shyǵyp turǵanyn baıqaǵan. Er adam birden gazǵa basyp, jolda júrý erejelerin óreskel buzyp, patrýldi polıtsııa ekıpajynan jasyrynbaq boldy.
Qýǵyn barysynda 30 jastaǵy júrgizýshi Jambyl kóshesindegi ǵımarattardyń biriniń janynda ustaldy. Quqyq buzýshyny ustaý kezinde jol qozǵalysynyń basqa qatysýshylary jáne azamattar zardap shekken joq. Er adam medıtsınalyq kýálandyrýdan ótýden bas tartty. Al kóligi mamandandyrylǵan aıyppul turaǵyna qoıyldy», - delingen SQO polıtsııa departamenti baspasóz qyzmeti taratqan habarlamada.
Polıtsııa qyzmetkerleriniń zańdy talabyna baǵynbaǵan, jolda júrý erejesin óreskel buzǵan kólik júrgizýshisine ákimshilik hattama toltyryldy. Jınalǵan materıal mamandandyrylǵan ákimshilik sotqa jiberildi. ⠀⠀⠀⠀⠀
Sottyń sheshimi boıynsha er adam 20 kúnge ákimshilik qamaýǵa alyndy, sondaı-aq 8 jylǵa kólik júrgizý quqyǵynan aıyryldy. ⠀⠀⠀⠀⠀
Vıdeodan alynǵan kadr
