Petropavlda kólik júrgizýshisi eki aptada jyldamdyq rejımin 56 ret buzǵan

PETROPAVL. QazAqparat – Petropavlda kólik júrgizýshi jyldamdyqty 56 ret asyryp, ıntellektýaldy beınetirkeý júıesine túsip qalǵan. Endi ol tek osy zań buzýshylyq úshin ǵana 1,3 mln teńge aıyppul tólemek, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda 24 mamyr men 8 maýsym aralyǵynda sheteldik tirkeýde turǵan VAZ-21101 avtokóligi jyldamdyqty 56 ret asyrǵan. Onyń bul áreketi ıntellektýaldy beınetirkeýge túsken. Zań buzýshyny kóliktiń saqtandyrý polısi bolmaǵandyqtan tez arada tabý múmkin bolmady.

Tártip saqshylary oǵan qatysty anyqtalmaǵan júrgizýshi sanaty boıynsha málimetter bazasyna baǵdar engizdi. Osylaısha kameralar ony avtomatty túrde izdeýdi bastady. «Megakam.Qorǵaý» qosymshasynyń kómegimen SQO PD jergilikti polıtsııa qyzmeti basqarmasynyń izdestirý tobynyń qyzmetkerleri qysqa merzimde avtokólikti anyqtady.

«Kólikti Petropavldyń 29 jastaǵy turǵyny basqarǵan. Jyldamdyq rejımin birneshe márte buzǵany úshin ol endi 1,3 mln teńgeden astam aıyppul tóleıdi. Sondaı-aq, jigitke kólikti saqtandyrý polısinsiz basqarǵany úshin 10 AEK mólsherinde aıyppul salyndy. Kólik arnaıy avtoturaqqa qoıyldy», - deıdi SQO PD ákimshilik polıtsııa basqarmasynyń bastyǵy Serik Áljanov.

SQO-da 8 maýsymnan bastap «Boryshker» jedel-profılaktıkalyq is-sharasy ótip jatyr. 6 kún ishinde ákimshilik aıyppul tólemegen 4745 adam anyqtalǵan.

Jalpy jyl basynan beri óńirde avtomatty tirkeýdiń beınejúıeleri arqyly barlyǵy 15,5 myń jol qozǵalysy erejelerin buzý faktisi tirkeldi.