Petropavlda kólik tonaýshy zamanaýı tehnologııalardy qoldanǵan
PETROPAVL. QazAqparat - Petropavlda polıtseıler «joǵary tehnologııalyq» avtourlyqshyny ustady, dep habarlaıdy QazAqparat tilshisi.
Іshki ister departamenti baspasóz qyzmetiniń aqparaty boıynsha, qaskúnem kóliktiń dabyl júıesiniń kodyn oqı alatyn qurylǵyny qoldanǵan.
«Mektep jáne dámhana mańynda sheteldik kólikterdi ańdyǵan. Skaner arqyly esikti ashyp salonnan baǵaly zattardy jymqyrǵan. Ol tek 2 kólikti ashyp, solardyń birinen 150 myń teńge urlaǵan. Al, ekinshi kóliktiń ıesi kezdeısoq kelip qalǵanda ury boı tasalaǵan», - delingen habarlamada.
Kúdikti polıtseılerdiń nazaranya ilikkenin bilip, Petropavldan qashyp ketken. Alaıda ony sol kúni keshkisin ustady. 27 jastaǵy Kókshetaý turǵyny «Urlyq jasaý» baby boıynsha 5 jylǵa deıin bas bostandyǵynynan aıyrylýy múmkin.
Polıtseıler zamanaýı tehnologııalardyń qylmys quralyna aınalyp bara jatqanyn aıtyp jatyr. Olardan qorǵaný ońaı emes. Skanerlerde kompıýterlik vırýs sııaqty baǵdarlama bar.
«Eski úlgidegi kólik dabyl júılerine qaýip tónip tur. Kólikterge qymbat sıgnalızatsııa ornatýǵa barlyǵynyń qaltasy kótermeıdi. Eń senimdi qorǵanys - salonda aqsha men baǵaly zattardy qaldyrmaý», - dep atap ótti Petropavl qalalyq PB bóliminiń bastyǵy Erbolat Qaptaev.
