Petropavlda kólik qaqqan 65 jastaǵy áıel oqıǵa ornynda mert boldy

PETROPAVL. QazAqparat – Petropavlda jeńil kólik júrgizýshisi jaıaý júrginshiler jolaǵynda 65-tegi áıeldi qaǵyp ketti, zardap shegýshi oqıǵa ornynda kóz jumdy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, jol-kólik oqıǵasy 13 maýsym kúni saǵat 12.20 shamasynda bolǵan.

Qyzyljar aýdanynyń 39 jastaǵy turǵyny «Nissan» markaly avtokólikti basqaryp kele jatyp, Qojabergen jyraý kóshesinde jaıaý júrginshiler ótkelinde áıeldi qaǵyp ketti.

Saldarynan zardap shegýshi – 65 jastaǵy áıel jedel medıtsınalyq kómek brıgadasy kelgenge deıin qaıtys boldy.

Atalǵan fakti negizinde QR Qylmystyq kodeksiniń 345-babynyń 3-bóligi boıynsha tergeý bastaldy.

Sotqa deıingi tergeý aıasynda polıtsııa qyzmetkerleri jol-kólik oqıǵasynyń mán-jaıy men sebepterin anyqtaıdy.

Birqatar qajetti saraptamalar taǵaıyndaldy. Júrgiziletin is-sharalardyń nátıjeleri boıynsha sońǵy protsessýaldyq sheshim qabyldanbaq.

Esterińizge salaıyq, bir kún buryn, ıaǵnı 12 maýsym kúni saǵat 14.30 shamasynda Petropavldyń aınalma jolynda «Toyota Alphard» jáne «Nissan Patrol» avtokólikteri soqtyǵysqan edi.

Saldarynan «Toyota Alphard» avtokóliginiń 71 jastaǵy jolaýshysy qaza tapty, taǵy úsh jolaýshy qaladaǵy medıtsınalyq mekemelerge jetkizildi.

Kýá bolǵandardyń aıtýynsha, júrgizýshi jyldamdyqty saqtamaǵan.