Petropavlda kólik qaǵyp ketken eki qyzdyń biri komada jatyr
PETROPAVL. QazAqparat - Petropavlda túngi klýbtyń janynda kólik qaǵyp ketken qyzdardyń jaǵdaıy áli de aýyr, dep habarlaıdy QazAqparat tilshisi.
Boıjetkenderdiń biri komada jatyr.
«25 jastaǵy qyz 15 qyrkúıek kúni tańǵy 5-te aýyr jaraqattarmen, mı jaraqatymen jáne qabyrǵasy synyp aýrýhanaǵa jetkizildi. Ota jasaldy. Boıjetkenniń hali aýyr, jan saqtaý bóliminde jatyr», - dedi Densaýlyq saqtaý basqarmasy basshysynyń orynbasary Dáýrenbek Beısembaev.
Boıjetken áli kúnge esin jımaǵan. D. Beısembaev emdik sharalardyń barlyǵy professor-neırohırýrgtarmen kelisilip ótkizilip jatqanyn aıtty. Qajet bolǵan jaǵdaıda dárigerler Petropavalǵa shaqyrtylady. Zardap shekken azamatshany ózdiginen jetkizýge jaǵdaıy kelmeıdi. Dárigerlerdiń aıtýynsha, soqqynyń saldaryn boljaý múmkin emes.
Ekinshi zardap shekken 22 jastaǵy qyz jol-kólik oqıǵasynan keıin janama jaraqattarmen 3-shi qalalyq aýrýhanaǵa jetkizildi. Jaǵdaıy aýyr dep baǵalanýda, esin jıdy. D. Beısembaevtyń málimetinshe, naýqas jan saqtaý bóliminen beıindik bólimge aýdaryldy.
Eske salaıyq, 15 qyrkúıek kúni Petropavldyń ortalyǵyndaǵy túngi klýbtyń aldynda «Leksýs» markaly kóliginiń júrgizýshisi eki qyzdy qaǵyp ketken edi. Kúdikti oqıǵa ornynan qashyp ketken. Soltústikqazaqstandyq polıtseıler jedel izdestirý sharalaryn júrgizip jatyr.
