Petropavlda kólik aıaldamaǵa soǵyldy, úsh bala jansaqtaý bóliminde jatyr
PETROPAVL. QazAqparat – Petropavldaǵy «Jumysshy» kentinde jeńil kólik aıaldamaǵa soǵylyp, tórt adam aýyr jaraqattandy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jol-kólik apaty «Jumysshy» kentindegi Panfılov kóshesinde saǵat 14.20 shamasynda bolǵan. VAZ-2108 kóliginiń júrgizýshisi rýlge ıe bola almaı qalǵan. Mashına adamdar turǵan aıaldamaǵa soǵyldy.
«Kóliktiń rýlinde 23 jastaǵy jigit bolǵan. Medıtsınalyq kýálandyrý onyń spırttik ishimdik ishpegenin kórsetti. Jol-kólik oqıǵasyna qatysty jınalǵan materıal ári qaraı anyqtalyp, protsessýaldyq sheshim qabyldanýy úshin Petropavl qalalyq polıtsııanyń ákimshilik bólimine berildi», - dedi baspasóz qyzmetindegiler.
Zardap shekken 4 adamnyń úsheýi – kámelet jasyna tolmaǵan bala. Barlyǵyn jedel járdem qyzmeti oblys ortalyǵyndaǵy emdeý mekemelerine jetkizdi. SQO densaýlyq saqtaý basqarmasy baspasóz qyzmetiniń málimetinshe, zardap shekkenderdiń biri – 43 jastaǵy Petropavl turǵyny. Áıeldiń aıaǵy synyp, bas súıek-mıy zaqymdanǵan, mıy shaıqalǵan. Zardap shegýshi qalalyq kópsalaly aýrýhanaǵa jatqyzyldy. Al, 7 jasar egizder oblystyq kópsalaly balalar aýrýhanasynyń jansaqtaý bólimine tústi, olardyń ishine zaqym kelgen. 12 jastaǵy balanyń da ishine zaqym kelip, sany syndy, ol da jansaqtaý bóliminde jatyr.
