Petropavlda kóligine jalǵan nómir taqqan júrgizýshi úsh táýlikke qamaldy
PETROPAVL. KAZINFORM - Petropavl qalasynyń ákimshilik quqyq buzýshylyqtar jónindegi mamandandyrylǵan soty jol qozǵalysy erejelerin buzǵan er adamǵa qatysty isti qarady.
Soltústik Qazaqstan oblystyq sotynyń málimetinshe, R. esimdi er adam «Toyota Camry» markaly kólikke tirkeý qujattaryna sáıkes kelmeıtin, T 028 RTM jalǵan memlekettik tirkeý nómirlik belgilerdi ádeıi qoldanǵanyn anyqtady.
Sot otyrysynda ol óz kinásin tolyq moıyndap, isti dereý qaraýdy jáne sot qaýlysynyń zańdy kúshine enýin surady.
Sot R.-ni Ákimshilik quqyq buzýshylyq týraly kodekstiń 590-baby 4-bóligi boıynsha kináli dep tanyp, oǵan 3 táýlikke ákimshilik qamaýǵa alý jáne 1 jyl merzimge kólik quralyn basqarý quqyǵynan aıyrý jazasyn taǵaıyndady. Al jalǵan nómirlik belgiler joıylatyn bolady.
Sot qaýlysy jarııa etilgen sátten bastap zańdy kúshine endi.
Esterińizge salaıyq, Almatyda jol erejesin buzǵan tanymal bloger ákimshilik jaýapkershilikke tartylǵan edi.