Petropavlda qoldanystaǵy lıftilerdiń jartysynyń paıdalaný merzimi ótip ketken
PETROPAVL. KAZINFORM — Petropavldaǵy 1,2 myńǵa jýyq kópqabatty turǵyn úıdiń 134-inde lıft bar. Alaıda onyń ár ekinshisiniń qujat boıynsha qoldaný merzimi ótken.
Soltústik Qazaqstan oblysy energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Janat Sádýaqasov qoǵamdyq keńeste óz salasyndaǵy máselelerdiń keıbirine toqtaldy.
Sonyń biri — lıft máselesi.
«Petropavlda qazirgi ýaqytta qoldanysta 421 jolaýshy jáne júk lıfti bar. Oblys ortalyǵynyń negizgi turǵyn úı qory ótken ǵasyrdyń 80-shi jyldardyń aıaǵy men 90-shy jyldardyń basyna jatatynyn eskersek, osy kezeńge olardyń paıdalaný merzimderi aıaqtaldy. Keıbirine 34 jyl bolǵan. Qazirgi ýaqytta shuǵyl aýystyrylýy qajet 89 lıft bar. Al onyń bireýin aýystyrýǵa orta eseppen 23 mln teńge qajet», — deıdi Janat Sádýaqasov.
Petropavlda 2011-2023 jyldar aralyǵynda 556 mln teńgege 24 úıde turǵyn úı-kommýnaldyq sharýashylyqty jańǵyrtý baǵdarlamasy aıasynda eski 54 lıft jańasyna aýystyryldy.
«Aýystyrýdy qajet etetin lıft sany olardyń paıdalanýǵa berilgen kúnine baılanysty jyl emes, aı saıyn ózgeredi. Máselen, búginde 184 lıftiniń paıdalanylý merzimi 25 jyldan asqan. Naryqtyń osy segmentinde qyzmet kórsetetin kompanııalar lıfti jumysqa jaramdy kúıde ustaý maqsatynda tıisti dıagnostıka júrgizip, tehnıkalyq qyzmet kórsetedi, ýaqtyly jóndeý jumystaryn júrgizedi», — deıdi Janat Sádýaqasov.
Qazirgi problemalardy eskere otyryp, basqarma birqatar is-sharany júrgizbek.
«Petropavldaǵy turǵyn úılerdegi lıftilerdiń jaı-kúıin anyqtaý maqsatynda turǵyn úı ınspektsııasymen, mamandandyrylǵan ýákiletti uıymmen birlesip, tehnıkalyq tekserý júrgizýdi jáne tekserý aktilerin jasaýdy uıymdastyramyz. Tekserý júrgizilgennen keıin jóndeý qajet úılerdiń, sonyń ishinde lıftilerdiń kezegi jasalady. Biz kúrdeli jóndeý qajet úılerdiń úlesin azaıtyp, respýblıkalyq deńgeı — 31% jetýimiz kerek, qazir oblysta ol — 49%. Ol úshin biz jyl saıyn kem degende 20 úıdi jóndeýimiz qajet. Oblys aýdandaryn mindetti túrde qosyp, úıler sanyn kóbeıte otyryp, 3 jylǵa Jol kartasyn ázirleımiz», — deıdi Janat Sádýaqasov.
