Petropavlda qoqysty jınap, óńdeýmen 12 kásiporyn aınalysady
PETROPAVL. QazAqparat – Soltústik Qazaqstan oblysyndaǵy 450-den astam qoqys polıgonynyń 17-siniń ǵana qujattary túgel, dep habarlaıdy QazAqparat tilshisi.
SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, óńirdegi 458 turmystyq qatty qaldyqtar polıgonynyń 279-ynyń ǵana jer aktileri ǵana bar. 179-ynda jerdiń qujaty bolmaǵandyqtan tártipke keltirý úshin qarajat bólinbeıdi.
«Alaıda bar qujaty túgel aýdandar da qoqys oryndarynda úıip jınaý jumystaryn júrgizbeıdi. Byltyr polıgondardy jónge keltirýge aýdandar 13 mln 977 myń teńge bóldi, biraq jumystar aıaqtalmady. Qyzyljar jáne Aqjar aýdandarynyń ortalyqtarynda turmystyq qatty qaldyqtardy bólip jınaıtyn 40 shaqty konteıner ornatylǵan. Birde-bir aýdanda qoqys óńdelmeıdi jáne qaıtalama shıkizatty qabylaıtyn oryn joq», - deıdi SQO Tabıǵı resýrstar jáne tabıǵat paıdalanýdy retteý basqarmasynyń jetekshisi Marat Eskendirov.
Petropavl qalasynda turmystyq qatty qaldyqty jınap, qaıta óńdeýmen 12 kásiporyn aınalysady. Byltyr olar 7550 tonna qoqysty kádege jaratqan. Shıkizat retinde óńdep qana qoımaı, kúndelikti qoldanylatyn taýar retinde shyǵarady.
«Oblys ortalyǵynda turmystyq qatty qaldyqty bólip jınaý maqsatynda 954 konteıner ornatylǵan. Onyń 370-i aýlalarda byltyr paıda boldy. Al qoldanylǵan qaǵazdy jınaýǵa memlekettik mekemeler men uıymdarǵa 800 ekoboks qoıylǵan. Eski elektr qondyrǵylaryn Petropavldaǵy 13 arnaıy konteınerge tastaýǵa bolady. Budan basqa qaıtalama shıkizatty qabyldaıtyn 9 oryn uıymdastyrylǵan», - deıdi Marat Eskendirov.
Mamandardyń aıtýynsha, ǵaryshtan monıtorıng júrgizý barysynda byltyr oblys aýmaǵynda ruqsat etilmegen 900-ge jýyq qoqys polıgony anyqtaldy. Atqarylǵan jumys nátıjesinde onyń sany 200-ge qysqartyldy.
